انڈیا کی خلائی ایجنسی ’اسرو‘ نے بتایا ہے کہ چندریان 3 نے چاند کی قطب جنوبی پر تاریخی لینڈنگ کے ایک روز بعد آج پہلی مرتبہ حرکت کی ہے۔
اسرو کی جانب سے جاری ایک بیان میں کہا گیا ہے کہ چندریان تھری کا روور آج اس کے لینڈر سے ریمپ کے ذریعے نیچے اُترا اور ’انڈیا نے آج چاند پر اپنے پہلے قدم اٹھائے۔‘
خیال رہے کہ بدھ کی شام وکرم لینڈر نے چاند کی سطح پر کامیاب لینڈنگ کی تھی جس کے بعد انڈیا چاند پر سافٹ لینڈنگ کرنے والا چوتھا ملک بن گیا ہے۔
26 کلو وزنی روور ’پرگیان‘ کو وکرم لینڈر میں چاند تک پہنچایا گیا تھا۔ جب گذشتہ روز ہونے والی لینڈنگ کے بعد چاند سے سطح سے اٹھنے والی دھول بیٹھ گئی تو ’وکرم‘ کے ایک طرف کے پینلز کُھلے اور ’پرگیان‘ کو چاند کی سطح پر پہلی مرتبہ اُترنے کا موقع ملا۔
اب یہ روور چاند کی سطح پر موجود پتھروں اور گڑھوں کے اطراف گھومتے ہوئے اہم ڈیٹا اکٹھا کرے گا جسے بعد میں زمین پر جائزے کے لیے بھیجا جائے گا۔
پرگیان میں دو سائنسی آلات نصب ہیں جو چاند کی سطح پر معدنیات اور اس کی مٹی کے کیمیائی تجزیے کریں گے۔
آج سے قبل دنیا کا کوئی بھی ملک چاند کے اس حصے (قطب جنوبی) پر سافٹ لینڈنگ میں کامیاب نہیں ہوا تھا۔
یہ جگہ چاند کے اس حصے کے مقابلے میں بہت مختلف اور پراسرار ہے جہاں اب تک دنیا بھر کے ممالک سے خلائی مشن بھیجے جا چکے ہیں۔
Getty Imagesچاند کا قطب جنوبی کتنا خطرناک ہے؟
چاند پر بھیجے گئے زیادہ تر مشن چاند کے خط استوا تک پہنچے ہیں جہاں قطب جنوبی کے مقابلے میں زمین زیادہ ہموار ہے۔
اس کے ساتھ ساتھ چاند کے قطب جنوبی پر بہت سے آتش فشاں ہیں اور یہاں کی زمین بہت ناہموار ہے۔
چندریان 3 کی طرف سے بھیجی گئی چاند کی سطح کی تازہ ترین تصاویر میں گہرے گڑھے اور کھردری سطح واضح طور پر دیکھی جا سکتی ہے۔
چاند کا جنوبی قطب تقریباً 2500 کلومیٹر چوڑے اور آٹھ کلومیٹر گہرے گڑھے کے کنارے پر واقع ہے جسے نظامِ شمسی کا سب سے پرانا ’امپیکٹ‘ گڑھا سمجھا جاتا ہے۔
امپیکٹ کریٹر سے مراد کسی سیارے میں موجود وہ گڑھے ہیں جو کسی بڑے شہابی پتھر یا سیاروں کے تصادم سے بنتے ہیں۔
BBCاربوں سالوں سے تاریکی میں ڈوبا ہوا علاقہ
امریکی خلائی ایجنسی ناسا کے پراجیکٹ سائنسدان نوح پیٹرو نے چندریان 3 کے اس مقام پر پہنچنے کی اہمیت بتائی ہے۔
وہ کہتے ہیں کہ ’جنوبی قطب پر اترنے سے آپ اس (تاریخی) گڑھے اور اس کی اہمیت کو سمجھنا شروع کر سکتے ہیں۔‘
ناسا کے مطابق سورج چاند کے قطب جنوبی پر افق سے نیچے یا تھوڑا سا اوپر رہتا ہے۔
چاند کے اس حصے پر جن دنوں سورج کی تھوڑی سی بھی روشی پڑتی ہے تو وہاں درجہ حرارت 54 ڈگری سینٹی گریڈ تک پہنچ جاتا ہے۔
لیکن اس علاقے میں بہت سے بلند و بالا پہاڑ اور گہرے گڑھے ہیں جو روشن دنوں میں بھی اندھیرے میں ڈوبے رہتے ہیں۔
ان میں سے ایک پہاڑ کی اونچائی ساڑھے سات ہزار میٹر ہے۔ ان گڑھوں اور پہاڑوں کے سائے میں آنے والے علاقوں میں درجہ حرارت منفی 203 ڈگری سینٹی گریڈ سے منفی 243 ڈگریتک پہنچ جاتا ہے۔
NASAمختلف ممالک قطب جنوبی کی طرف کیوں بڑھ رہے ہیں؟
ناسا نے بتایا ہے کہ اس کے پاس جدید ترین سینسرز موجود ہیں لیکن چاند کی ناہموار سطح اور انتہائی کم روشنی کی وجہ سے چاند کے قطب جنوبی پر اترنے والے روور سے مزید معلومات اکٹھی کرنا مشکل ہو گا۔
اس کے ساتھ ساتھ درجہ حرارت بڑھنے اور گرنے سے اس کے کچھ نظام متاثر ہو سکتے ہیں۔
ان دنوں چاند نہ صرف انڈیا بلکہ روس اور چین کی خلائی ایجنسیوں کے لیے بھی دلچسپی کا موضوع بنا ہوا ہے۔
روس نے چندریان 3 کے زمین سے روانہ ہونے کے بعد اپنا مشن لونا 25 چاند کی طرف بھیجا تھا اور اسے بھی چاند کے جنوبی قطب پر اترنا تھا۔
تاہم رواں ہفتے لینڈنگ سے کچھ گھنٹے قبل ’کنٹرول سے باہر ہونے کے بعد‘ یہ چاند کی سطح پر گر کر تباہ ہو گیا تھا۔ یہ گذشتہ 47 سالوں میں چاند کی طرف بھیجا گیا روس کا پہلا خلائی مشن تھا۔
پانی کی دریافت بھی ایک بڑی وجہ
اس کے ساتھ ساتھ چین آنے والے وقت میں چاند کے لیے اپنی مہم بھی شروع کرنے والا ہے۔ چین کا ’چانگ ای 4‘ نامی مشن سنہ 2019 میں چاند کی غیر مرئی سطح پر اترا تھا۔
چندریان -3 اور چندریان -4 کے بعد انڈیا 2026 میں جاپان کے ساتھ مشترکہ پولر ایکسپلوریشن مشن پر بھی کام کرے گا جس کا مقصد چاند کے تاریک حصوں کے بارے میں معلومات حاصل کرنا ہے۔
تاہم سوال یہ پیدا ہوتا ہے کہ یہ تمام ممالک چاند کے اس حصے تک پہنچنے کی کوشش کیوں کر رہے ہیں جہاں تک پہنچنا بہت خطرناک ہے۔
ماہرین کے مطابق اس دوڑ کے پیچھے ایک وجہ چاند پر پانی دریافت کرنا بھی ہے۔
ناسا کے لونر ری کنیسانس آربٹر کے ذریعے جمع کیے گئے ڈیٹا سے ظاہر ہوتا ہے کہ چاند پر گہرے گہرے گڑھوں میں برف موجود ہے۔
یہ آربٹر گذشتہ 14 برس سے چاند کے گرد چکر لگا رہا ہے۔ برف کی موجودگی کی بنیاد پر یہ امید ظاہر کی جا رہی ہے کہ اس سے انسانوں کو چاند پر بھیجنے کی راہ ہموار ہو سکتی ہے۔
کم کشش ثقل کی وجہ سے چاند کا اپنا کوئی ایٹماسفیئر (آب و ہوا) نہیں ہے۔ ایسی صورتحال میں یہاں پانی صرف ٹھوس یا گیسی حالت میں موجود رہ سکتا ہے۔
انڈیا کا چندریان 1 دنیا کا پہلا قمری مشن تھا جس نے سنہ 2008 میں چاند پر پانی کی دستیابی کا پتہ لگایا تھا۔
امریکی یونیورسٹی آف نوٹریڈیم میں ماہرِ فلکیات پروفیسر کلائیو نیل کہتے ہیں کہ ’اب تک یہ برف اس طرح سے ظاہر نہیں ہوئی کہ ہم یہ کہہ سکیں کہ یہ آسانی سے حاصل کی جا سکتی ہے۔‘
سائنسدانوں کے لیے چاند پر پانی کی تلاش کا امکان بہت سی امیدوں کو جنم دیتا ہے۔
چاند کے سرد قطبی خطوں پر سورج کی روشنی نہیں پڑتی اور یہ اندازہ لگایا گیا ہے کہ برفیلا پانی پچھلے لاکھوں سالوں کے آہستہ آہستہ سطح تک پہنچ سکتا ہے۔
اگر سائنسدانوں کو اس قسم کی برف کا نمونہ مل جائے تو انھیں ہمارے نظام شمسی میں پانی کی تاریخ کو سمجھنے کا موقع ملے گا۔
یورپی سپیس ایجنسی کے ساتھ کام کرنے والی برطانیہ کی اوپن یونیورسٹی میں سیاروں کی سائنسدان سیمون باربر کا کہنا ہے کہ ’ہم ان سوالوں کے جواب دے سکتے ہیں کہ جیسے پانی کب سے آیا، کہاں سے آیا اور زمین پر زندگی کی نشوونما پر اس کے اثرات کیا ہیں۔‘