اسلام آباد ہائی کورٹ نے توشہ خانہ کیس کا مکمل ریکارڈ طلب کرلیا

اسلام آباد ہائی کورٹ نے عمران خان کے خلاف توشہ خانہ کیس کا مکمل ریکارڈ طلب کرلیا ہے۔

اسلام آباد ہائی کورٹ چیئرمین  پاکستان تحریک انصاف عمران خان کے خلاف توشہ خانہ کیس میں سزا کے خلاف اپیل پر سماعت کا تحریری حکم نامہ جاری کردیا ہے۔ 

چیف جسٹس عامر فاروق، جسٹس طارق محمود جہانگیری نے تفصیلی فیصلے میں عمران خان کے خلاف توشہ خانہ کیس کا مکمل ریکارڈ طلب کرلیا اور رجسٹرار آفس کو چیئرمین پی ٹی آئی کی سزا معطلی کی درخواست جلد مقرر کرنے کی ہدایت  کی ہے۔

حکم نامے کے مطابق عدالت نے فریقین کو سزا کے خلاف اپیل اور سزا معطلی کی درخواست پر نوٹسز جاری کیے۔ 

عدالتی حکم کے مطابق عمران خان  کی اپیل ٹرائل کورٹ کے پانچ اگست کے فیصلے کے خلاف ہے۔ عمران خان کے خلاف الیکشن کمیشن کی شکایت پر ٹرائل چلایا گیا۔ ٹرائل کورٹ نے چیئرمین پی ٹی آئی کو تین سال قید اور ایک  لاکھ روپے جرمانے کی سزا سنائی تھی۔

عدالت نے حکم دیا کہ فریقین کو نوٹس جاری کیے جائیں  اور  کیس کا ریکارڈ بھی منگوایا جائے۔

واضح رہے کہ  چیئرمین پی ٹی آئی عمران خان نے سزا معطل کرکے ضمانت پر رہائی کی درخواست کر رکھی ہے۔