اوورسیز پاکستانیز کے مسائل حل کرنے کے لیے ہاٹ لائنز قائم کرنے کا فیصلہ

پاکستان کے وزیراعظم شہباز شریف نے کہا ہے کہ سمندر پار پاکستانیز کے لیے انٹرنیشنل ایئرپورٹس پر خصوصی کاؤنٹرز قائم کیے جائیں گے اور ان کے دیگر مسائل حل کرنے کے لیے چیف سیکریٹری کی سربراہی میں میں ہاٹ لائنز قائم کی جائیں گی۔

اسلام آباد میں ایک تقریب سے خطاب کرتے ہوئے انہوں نے کہا کہ  ’سمندرپار پاکستانیز کی پراپرٹی کے مسائل حل کرنے کے لیے کابینہ نے اسلام آباد کی حد تک خصوصی عدالتیں قائم کرنے کے بل کی منظوری دے دی اور اس کا نفاذ دیگر صوبوں میں بھی کیا جائے گا۔‘

شہباز شریف نے کہا کہ ’سعودی عرب، یو اے ای  اور یورپ میں ہنرمند افرادی قوت کی ضرورت ہے۔ سمندر پار پاکستانیز دنیا بھر میں ہمارے سفیر ہیں۔‘

ان کا کہنا تھا کہ ’اوورسیز پاکستانیوں کے بچوں کے لیے پاکستان کی میڈیکل اور انجینیئرنگ یونیورسٹیز میں پانچ فیصد کوٹہ مختض کیا جائے گا۔‘

وزیراعظم نے کہا کہ ’سب سے زیادہ ترسیلات زر بھیجنے والے دس خاندانوں کو ایوارڈز دیے جائیں گے۔‘

وزیراعظم نے سمندرپار پاکستانیوں کے لیے پبلک سیکٹر ہاؤسنگ سکیموں میں 10 فیصد کوٹہ مختص کرنے کا بھی اعلان کیا۔