سپین کے شہر بارسلونا میں ایک تاریخی اور مشہور دکان نے اعلان کیا ہے کہ جو سیاح کچھ نہیں خریدتے اور صرف سیلفی یا تصاویر بنانے کے لیے آتے ہیں ان سے پانچ یورو فیس وصول کی جائے گی۔برطانوی اخبار انڈیپینڈنٹ کے مطابق اس دکان کا نام کیووویورس میوریا ہے جس کا قیام 1898 میں ہوا۔ یہاں چیز، خاص قسم کا گوشت اور دیگر مشروبات فروخت کیے جاتے ہیں اور یہ بارسلونا کا ایک مشہور سٹور ہے۔دکان کا فرنٹ، قدیم کاؤنٹر، مہاگنی فرنیچر اور 1920 کا سائن بورڈ سیاحوں کو تصاویر لینے کے لیے کھینچتا ہے، لیکن وہ اکثر وہاں سے خریداری نہیں کرتے۔دکان کے سٹاف نے ایک دن مذاق میں کہا کہ ایسے سیاحوں سے پیسے لینے چاہیں جو کچھ خریدے بغیر صرف اسے دیکھنے اور تصاویر بنانے آتے ہیں۔ لیکن یہ مذاق اب ایک حقیقت بن چکا ہے کیونکہ انتظامیہ نے دکان باہر لکھ دیا ہے کہ دکان کو ’صرف دیکھنے والوں کے لیے پانچ یورو فی کس، شکریہ۔‘دکان کے مینجر ٹونی میرینو کے مطابق اگرچہ ابھی تک کسی سے رقم وصول نہیں کی گئی، لیکن سیلفی لینے والے سیاحوں کی تعداد کم ہو گئی ہے۔حالیہ برسوں میں بارسلونا میں ضرورت سے زیادہ سیاحت سے نمٹنے کے لیے کئی پالیسیز متعارف کروائی گئی ہیں۔ رواں برس کے آغاز میں اعلان کیا گیا کہ 2024 تک فائیو سٹار گیسٹ ہاؤسز کے لیے ایک رات قیام کا میونسپل ٹورسٹ ٹیکس 5.25 یورو سے 6.75 یورو کر دیا جائے گا۔ریجن میں ایک رات قیام کے جنرل ٹورسٹ ٹیکس کے علاؤہ بارسلونا اپنا سرچارچ بھی وصول کرتا ہے جس کی منظوری سپین کی حکومت نے 2020 میں دی تھی۔ٹورسٹ ٹیکس میں رہائش کے حساب سے کمی بیشی بھی ہوتی ہے اور اس کا اطلاق صرف ریگولیٹڈ اور سرکاری ٹورسٹ گیس ہاؤسز پر ہوتا ہے۔