حالیہ رپورٹ کے مطابق ایک سال کے دوران گاڑیوں کی فروخت میں 55 فیصد تک کمی دیکھنے میں آئی ہے۔
تفصیلات کے مطابق یہ رپورٹ پاکستان آٹو موبائل مینوفیکچررز ایسوسی ایشن کی جانب سے سامنے لائی گئی۔ رپورٹ کے مطابق ایک سال کے دوران ٹریکٹرز اور ٹرکوں کی فروخت میں 46 فیصد کمی ریکارڈ کی گئی جبکہ سال بھر میں بسوں کی فروخت میں 6 فیصد تک کمی آئی۔
رپورٹ میں بتایا گیا کہ اس عرصے کے دوران گاڑیوں کی فروخت میں 55 فیصد تک کی بڑی کمی ریکارڈ ہوئی۔ گاڑیوں میں سب سے زیادہ مسافر کاروں کی فروخت متاثر ہوئی۔ علاوہ ازیں یوٹیلیٹی وینز، پک اپس اور جیپوں کی فروخت میں بھی 29 فیصد کمی آئی۔
پاکستان آٹو مینوفیکچررز ایسوسی ایشن کی رپورٹ میں کہا گیا کہ ایک سال میں صرف موٹر سائیکلز کی فروخت 35 فیصد تک کم ہوگئی۔
رپورٹ کے مطابق پیداواری لاگت اور خام مال کی قلت میں بڑھتے ہوئے اضافہ اور درآمدات میں مشکلات کی وجہ سے آٹو موبائل انڈسٹری شدید متاثر ہو رہی ہے۔ اسی طرح گاڑیوں کی فروخت میں کمی کی ایک بڑی وجہ ڈالر کی بڑھتی ہوئی قیمت اور شرح سود میں اضافہ ہے۔