پانامہ کیس میں تاحیات نااہلی کے بعد پارلیمان میں قانون سازی کی وجہ سے نوازشریف کی تاحیات نااہلی کی سزا پانچ سال تک محدود ہوگئی، سابق وزیراعظم نااہلی کی مدت کم ہونے کی وجہ سے ایک بار پھر الیکشن لڑنے کیلئے اہل ہوگئے، جہانگیر ترین کو بھی الیکشن کیلئے اجازت مل گئی۔
وفاقی وزیرقانون اعظم نذیر تارڑ کا کہنا ہے کہ 13 اگست کو اسمبلی کی مدت ختم ہونے پر ملک میں نگراں حکومت آجائے گی۔ ان کا کہنا ہے کہ الیکشن ایکٹ میں ترمیم کے بعد نوازشریف کی تاحیات نااہلی ختم ہوگئی ہے، نوازشریف اور جہانگیرترین الیکشن میں حصہ لینے کیلئے اہل ہوچکے ہیں۔
نجی ٹی وی گفتگو کرتے ہوئے انہوں نے کہا کہ آئین میں کہیں بھی نااہلی 5سال سے زیادہ نہیں ، کسی بھی شخص کی نااہلی 5سال کیلئے ہوگی، آج کے قانون کے بعد کوئی شخص تاحیات نااہل نہیں رہ سکتا۔
اعظم نذیرتارڑ نے مزید کہا کہ نوازشریف کی تاحیات نااہلی ختم ہوگئی مگر نیب کیس میں سزا کے سبب وہ انتخاب نہیں لڑ سکتے۔ نوازشریف وطن واپسی پر اپیل دائر کریں گے اور امید ہے اس میں بھی سرخرو ہو جائیں گے۔
وزیر قانون نے نے مزید کہا کہ پارلیمنٹ کے علاوہ کوئی دوسرایہ اختیاراستعمال نہیں کرسکتا، قانون بنانا اور اس میں ترمیم کرنا پارلیمنٹ کا آئینی اختیار ہے، آج کسی کولگ رہا ہے وہ ان ترامیم کابینفشری ہے توکل کوئی اور ہوگا۔
یاد رہے کہ مسلم لیگ (ن) کے قائد نوازشریف 3 بار پاکستان کے وزیراعظم بن چکے ہیں تاہم تینوں بار انہیں مدت مکمل کرنے سے پہلے عہدے سے ہٹا دیا گیا تاہم مسلم لیگ (ن) ایک با ر پھر انہیں وزیراعظم بنوانے کیلئے ایڑی چوٹی کا زور لگارہی ہے۔