زمان پارک میں دہشت گردوں کی اطلاعات پر 24 گھنٹے میں ملزمان کی گرفتاری کیلئے پنجاب حکومت کی جانب سے دیا گیا الٹی میٹم ختم ہونے کے بعد پولیس کی بھاری نفری نے زمان پارک کے راستے بند کرکے علاقے کا محاصرہ کرلیا گیا۔
گزشتہ روز نگراں وزیر اطلاعات پنجاب عامر میر نے عمران خان کو زمان پارک میں موجود افراد کو پولیس کے حوالے کرنے کے لیے 24 گھنٹے کا الٹی میٹم دیتے ہوئے کہا تھا کہ لاہور میں عسکری تنصیبات پر حملہ کرنے والے 30 سے 40 افراد زمان پارک میں عمران خان کی رہائش گاہ میں پناہ لیے ہوئے ہیں اور اگر آئندہ 24 گھنٹے میں انہیں پولیس کے حوالے نہیں کیا گیا تو کارروائی ہوگی۔
پنجاب حکومت کی جانب سے دی جانے والی ڈیڈ لائن ختم پرپولیس کو الرٹ کردیا گیا ہے اور زمان پارک کی طرف جانے والے تمام راستے بند کردیے گئے ہیں اورپولیس کی بھاری نفری زمان پارک کے چاروں اطراف موجود ہے۔
پولیس لائنز قلعہ گجرسنگھ کے قریب کنٹینرپہنچا دیے گئے ہیں اور علاقہ مکینوں کو شناخت کے بعد داخلے کی اجازت دی جارہی ہے۔