فضائی سفر میں انقلاب ۔۔ آواز سے بھی تیز جہاز، اب دنوں کا سفر منٹوں میں واقعی ممکن؟

یورپی ہائپر سونک اسٹارٹ اپ نے جرمنی سے آسٹریلیا اور میمفس سے دبئی کی فلائٹ چند منٹوں تک محدود کرنے کے منصوبے پر تیزی سے کام کرنے کا دعویٰ کردیا۔

میڈیا رپورٹس کے مطابق تقریباً 2 دہائیوں سے اینٹی بوم ٹیکنالوجی کے ساتھ سپر سونک، ہائپرسونک، ہائیڈروجن سے چلنے والے طیارے متعارف کرانے اور سفر کو تیز ترین بنانے کے دعوے کئے جارہے ہیں تاہم اس پر پیشرفت نہیں ہوسکی۔

اب ایک بار پھر دعویٰ سامنے آیا ہے کہ دی ڈیسٹینس کانسپیٹ ہائیڈروجن سے چلنے والی فلائٹ ہے جو آواز کی رفتار سے 5 گنا تیز ہوگی اور اس سے سفر کا دورانیہ موجودہ ہوائی جہاز کے سفری دورانیے سے ایک چوتھائی سے بھی کم ہوجائے گا۔

اس پراجیکٹ کا آغاز 2021 میں کیا گیا تھا اور اس کا ہیڈکوارٹر سوئٹزرلینڈ میں ہے، عملے کے تقریبا 120 افراد ہیں جو اسپین، فرانس اور جرمنی سے کام کرتے ہیں، یہ پراجیکٹ تیزی سے سنگ میل عبور کررہا ہے۔

میڈیا رپورٹس کے مطابق منصوبے کے پہلے دو پروٹو ٹائپ نے کامیاب آزمائشی پروازیں کیں اور وہ ہائیڈروجن سے چلنے والی پرواز کی جانچ شروع کرنے والی ہیں۔

اس کا تیسرا پروٹو ٹائپ ڈیسٹینس تھری رواں سال کے آخر تک اپنی افتتاحی پرواز کرنے کیلئے تیار ہوگا۔کمپنی کی بزنس ڈیولپمنٹ مینیجر مارٹینا لوفکوسٹ کا کہنا ہے کہ کمپنی پہلے چھوٹے حجم کے طیارے یا ڈرونز تیار کر رہی ہے، اس کے بعد مسافر بردار طیارے بنانے کیلئے کام شروع کیا جائے گا۔