فخر زمان کی تعریف ہی تو کی تھی لیکن ۔۔ بابر اعظم کے مداح ثناء میر پر کیوں برہم؟ ویڈیو

پاکستان ویمن کرکٹ ٹیم کی سابق کپتان ثناء میر کی جانب سے نیوزی لینڈ کیخلاف دوسرے ایک روزہ میچ میں شاندار اننگ پر فخر زمان کی تعریف کی ویڈیو سامنے آنے پر بابر اعظم کے مداحوں نے ثناء میر کو نشانے پر رکھ لیا۔

سوشل میڈیا پر وائرل ویڈیو میں ثناء میر کہہ رہی ہیں کہ ’ہم آف ائیر بھی یہ بات کر رہے تھے کہ فخر زمان ہمیشہ ٹیم کیلئے رنز کرتے ہیں، اگر وہ سنچری اسکور کرتے ہیں تو اسٹرائیک ریٹ 100 نہیں بلکہ 125 کا ہوتا ہے جو 350 کے قریب کا ہدف حاصل کرنے میں کافی اہم ہوتا ہے۔‘

ثناء میر نے مزید کہا کہ یہی وجہ ہے کہ فخر اس ٹیم کیلئے کافی اہمیت رکھتے ہیں، کیوں کہ جہاں ہمارے پاس پہلے ہی ٹیم میں ایسے کھلاڑی ہیں جو رن اے بال کھیلتے ہیں لہٰذا 300 سے زائد کا ہدف حاصل کرنے میں فخر کا کردار کافی اہم ہوجاتا ہے۔

اس ویڈیو میں ثناء میر نے کسی کا نام نہیں لیا لیکن انکی اس ویڈیو پر بابر اعظم کے مداحوں نے سوشل میڈیا پر تنقید کا طوفان برپا کردیا ہے۔