مارنے والے سے بچانے والا بڑا ہوتا ہے۔ آج تک سب انسانوں نے یہ بات گھر کے بڑے بزرگوں سے سن رکھی ہوگی۔ آج یہ بات سچ ہو ہی گئی۔
جی ہاں ہوا کچھ یوں کہ کراچی کے علاقے بلدیہ ٹاؤن رشیدآباد میں ایک فرد اپنے محلے کی گلی میں سے گزر رہا تھا تو اس کے پیچھے ایک پستول لیے شخص بھی بھاگنے لگا۔
یہ منظر سی سی ٹی وی کیمرے میں قید ہو گیا۔ جیسے ہی ہاتھ میں پستول لیے ملزم نے دیکھا کہ مذکورہ شہری سن سان گلی کی طرف گیا تو اس نے اس پر پستول تان لی اور اسے جان سے مارنے کی کوشش کی مگر وہ ناکام رہا کیونکہ اس نے جیسے ہی گولی چلانے کی کوشش کی تو پستول میں ہی گولی پھنس گئی۔ لاکھ کوششوں کے بعد جب گولی نہ چلی۔
تو بھی یہ ڈرا نہیں بلکہ بڑے آرام سے دوبارہ پستول لوڈ کر کے اس شخص کو مارنا چاہا مگر پھر سے ناکام رہا۔ اب کی بار ملزم ڈر کر اپنی موٹر سائیکل پر بھاگ گیا۔
اس افسوسناک واقعے پر ایس ایس پی ویسٹ فدا حسین جانوری نے کہا کہ یہ شخص کچھ ہی دن پہلے ایک سیاسی جماعت سے دوسری سیاسی جماعت میں شامل ہوا تھا اور ملزم کا مقصد اسے ٹارگٹ کرنا ہی تھا۔