انوکھی مسجد جس کی کھڑکیوں سے چاند دیکھا جاسکتا ہے

نوشہرو فیروز میں ڈھائی سو سال پرانی ایک انوکھی مسجد موجود ہے جس کے محرابوں سے چاند کی تاریخ کا اندازہ لگانا ممکن ہے۔ 

مقامی رہائشی محمد رمضان کمبوہ کے مطابق یہ محراب خان نامی یہ مسجد نیشنل ہائی وے پر ہالانی شریف کے نزدیک واقع ہے۔ ڈھائی سو سال پرانی یہ مسجد کلہوڑوں کے زمانے میں بنائی گئی تھی۔

رہائشی کا کہنا ہے کہ اس مسجد میں خاص مہارت سے چھوٹی سی جگہ پر ایسی سیڑھیاں بنائی گئی ہیں جو ایک فِٹ سے زیادہ اونچی ہیں جس کی وجہ یہ ہے کہ اس دور میں لوگوں کا قد کافی دراز ہوتا تھا۔

اس مسجد کے محراب میں دو کھڑکیاں رکھی گئی ہیں جس سے شوال، رمضان اور ذوالحج کا چاند دیکھا جاتا تھا۔ دائیں طرف والی کھڑکی سے 30 کا اور بائیں طرف والی کھڑکی سے 29 کا چاند نظر آتا ہے۔ ان کھڑکیوں سے دیکھنے کے بعد ایسا زاویہ بنتا ہے جس سے اِدھر اُدھر نظر جانے کے بجائے سیدھی چاند پر جاتی ہے۔

محمد رمضان کمبوہ نے مزید بتایا کہ اس مسجد میں بہت نفاست سے ڈیزائننگ بھی کی گئی ہے۔ اس کے گنبد اور محرابوں کو اس انداز میں بنایا گیا ہے کہ اس سے روشنی آتی ہے۔ اس مسجد کی ایک اور خاص بات یہ ہے کہ اس مسجد میں پانی کی جگہ نناوے اونٹنیوں کا دودھ استعمال کیا گیا ہے۔