اسلام آباد: وزیراعظم شہباز شریف نے جسٹس قاضی فائز عیسیٰ کے خلاف کیوریٹیور ریویو ریفرنس واپس لینے کی ہدایات دے دیں۔
حکومت کا جسٹس قاضی فائز عیسی کے خلاف کیوریٹیو ریویو ریفرنس دائر ہوا تھا، وزیراعظم کی زیر صدارت اجلاس میں کابینہ اس فیصلے کی پہلے ہی منظوری دے چکی ہے۔
وزیراعظم شہباز شریف نے وزیر قانون کو جسٹس قاضی فائز عیسیٰ کے خلاف کیوریٹیور ریویو ریفرنس واپس لینے کا حکم دیا ہے۔
وزیراعظم شہباز شریف کا کہنا تھا کہ کمزور اور بے بنیاد وجوہات پر یہ ریفرنس دائر ہوا تھا، حکومت اس ریفرنس کی پیروی نہیں کرے گی۔
ان کا کہنا تھا کہ عمران نیازی نے صدر کے آئینی منصب کو اس مجرمانہ فعل کے لئے استعمال کیا۔
وزیراعظم نے کہاکہ ن لیگ اور اتحادی جماعتوں نے جھوٹے ریفرنس کی مذمت کی تھی،صدر عدلیہ پر حملے کے جرم میں آلہ کار اور جھوٹ کے حصہ دار بنے،پاکستان بار کونسل سمیت وکلا تنظیموں نے بھی اس کی مخالفت کی تھی۔
وزیراعظم شہباز شریف نے کہا کہ ریفرنس کے نام پر جسٹس قاضی فائز عیسیٰ اور ان کے اہل خانہ کو ہراساں کیاگیا،یہ ریفرنس نہیں قانون کی راہ پر چلنے والے ایک منصف کے خلاف عمران نیازی کی انتقامی کارروائی تھی، یہ ریفرنس عدلیہ کی آزادی پر شب خون اور اسے تقسیم کرنے کی مذموم سازش تھی۔