انڈیا میں دوران پرواز کاکپِٹ میں کافی کی تصویر وائرل، دو پائلٹ ڈیوٹی سے معطل

انڈیا کی ایک نجی ایئرلائن نے سفر کے دوران کاکپِٹ میں کافی پینے کے الزام میں دو پائلٹوں کو معطل کر دیا ہے۔

یہ واقعہ اس رواں ہفتے وائرل ہونے والی ایک تصویر کے بعد زیر بحث آیا ہے۔ تصویر میں دیکھا جا سکتا ہے کہ نجی ایئرلائن سپائس جیٹ کے ایک طیارے کے کنٹرول پینل پر کافی کا کپ پڑا ہے جس پر ڈھکن نہیں ہے۔

میڈیا رپورٹس کے مطابق جس وقت یہ تصویر لی گئی اس وقت طیارہ 37 ہزار فٹ کی بلندی پر تھا۔

اس تصویر پر غم و غصے کے بعد انڈیا کے ہوا بازی کے ادارے نے ائیرلائن کو وارننگ جاری کی ہے۔

سپائس جیٹ نے بدھ کو کہا تھا کہ وہ اس معاملے کی تحقیقات کر رہے ہیں اور مبینہ طور پر تصویر لینے والے پائلٹوں کو ڈیوٹی سے ہٹا دیا گیا ہے۔

ایئرلائن کے ترجمان نے اخبار ٹائمز آف انڈیا کو بتایا کہ ’تحقیقات مکمل ہونے پر ان کے خلافتادیبی کارروائی کی جائے گی۔‘

انڈین ایوی ایشن کے اصولوں کے مطابق پائلٹ اور عملہ کاکپِٹ میں سخت ضوابط کے تحت کھا پی سکتے ہیں۔ مثال کے طور پر کپ پر ڈھکن ہونا چاہیے اور کپوں کو ٹرے میں رکھا جائے تاکہ گرنے کی صورت میں یہ ٹرے پر گرے ناکہ آلات پر۔

اطلاعات کے مطابق یہ واقعہ ہولی کے دن دلی سے شمال مشرقی شہر گوہاٹی جاتے ہوئے ہیش آیا تھا۔

تصویر میں ایک کافی کپ دیکھا جا سکتا ہے جس پر ڈھکن نہیں ہے۔ کپ پر ایئرلائن کا لوگو موجود ہے اور یہ طیارے کو سٹارٹ کرنے والے لِیور کے بالکل پاس پڑا ہے۔ پائلٹ، جو اس تصویر میں نظر نہیں آ رہے، ہولی کی خاص مٹھائی گجیا پکڑے ہوئے ہیں۔

https://twitter.com/Mohan_Rngnathan/status/1635560522161737729

تصویر کے وائرل ہونے کے بعد لوگوں نے پائلٹوں کی لاپرواہی پر تنقید کی۔

اطلاعات کے مطابق اس تصویر کو سب سے پہلے ٹوئٹر پر شیئر کرنے والے ایوی ایشن کے ماہر موہن رنگناتھن نے کہا ’ہلکی سے بھی ٹربولینس (یا طیارے میں ہنگامی صورتحال) سے کافی الیکٹرانک آلات پر گرتی اور سسٹم میں گڑبڑ ہو سکتی تھی۔ یہ مجرمانہ حرکت ہے۔‘

منگل کو ایوی ایشن کے نگراں ادارے ڈائریکٹوریٹ آف سول ایوی ایشن نے تصویر کا نوٹس لیا اور سپائس جیٹ سے کہا کہ وہ عملے کی نشاندہی کرے۔

سپائس جیٹ کے ترجمان نے اخبار دی ہندو کو بتایا تھا کہ دو پائلٹوں کو ڈیوٹی سے ہٹا دیا گیا ہے جبکہ واقعے کی ٹائم لائن کا تعین کیا جا رہا ہے۔