پاکستانی فوج کے شعبہ تعلقات عامہ آئی ایس پی آر نے کہا ہے کہ جنوبی وزیرستان کے علاقے زنگاڑہ میں سکیورٹی فورسز کے دہشت گردوں کے خلاف آپریشن میں آٹھ دہشت گرد مارے گئے ہیں۔بدھ کی رات کو جاری بیان میں آئی ایس پی آر کا کہنا تھا کہ زنگاڑہ کے علاقے میں دہشت گردوں کی موجودگی کی اطلاع پر سکیورٹی فورسز نے آپریشن کیا۔بیان میں مزید کہا گیا ہے کہ سکیورٹی فورسز اور دہشت گردوں کے مابین فائرنگ کے تبادلے میں آٹھ دہشت گرد مارے گئے جب کہ دو فوجی زخمی ہوئے۔ فائرنگ میں مارٹر گولوں کا بھی استعمال کیا گیا۔’بدقسمتی سے فائرنگ کے تبادلے میں دو بجے بھی شہید ہوگئے۔‘قبل ازیں جنوبی وزیرستان کی ضلعی انتظامیہ نے دو بچوں کی ہلاکت کی تصدیق کی تھی۔اسسٹنٹ کمشنر لدھا انیس الرحمان نے پشاور میں اردو نیوز کے نامہ نگار فیاض احمد کو بتایا کہ دھماکے میں بچے ہلاک ہوگئے ہیں۔ ’جائے وقوعہ دورافتادہ ہونے کی وجہ سے دھماکے کی نوعیت کا اندازہ نہیں لگایا جاسکتا۔‘ ان کا کہنا تھا کہ ڈپٹی کمشنر کی ہدایت پر کل لواحقین سے ملنے جارہے ہیں جس کے بعد صورتحال کا اندازہ لگایا جاسکے گا ۔پولیس کے ایک اعلی افسر کے مطابق زنگاڑہ اور اس سے متصل علاقوں میں دہشت گردوں کے ٹھکانے کی اطلاعات ہیں جن کے خلاف گزشتہ کئی دنوں سے سرچ اینڈ سٹرائیک آپریشن جاری ہے ۔