معروف صحافی ارشد شریف شہید کی بیوہ جویریہ صدیق کا کہنا ہے کہ پچھلے ماہ جب میری کردار کشی ہورہی تھی تو میری اپنی میڈیا کمیونٹی بھی خاموش تھی۔
گزشتہ سال کینیا میں پولیس کی فائرنگ سے شہید ہونے والے صحافی ارشد شریف کی اہلیہ جویریہ صدیق کا کہنا ہے کہ ارشد کو دبئی میں ویزا کی معیاد ختم ہونے پر فوری کینیا جانا پڑا جہاں انہیں موت کے گھاٹ اتارنے کی سازش ہوئی۔
انسانی حقوق کے عالمی اداروں نے میرے شوہر کے قتل پر آواز اٹھائی لیکن پاکستان میں میرے شوہر کے قتل کے بعد میرے لئے انتہائی نازیبا مہمات چلائی جارہی ہیں۔
جویریہ صدیق نے کہا کہ گزشتہ مہینے فروری میں میری سنگین کردار کشی کی گئی، عدت کے دوران شادی کرنے کے الزامات بھی لگائے گئے لیکن حکومت کی حامی میری صحافی برادری میرے ساتھ کھڑی نہیں ہوئی۔
انہوں نے کہا کہ ارشد شریف کے قاتلوں کو بے نقاب کرنے کے بجائے سوشل میڈیا صارفین میرے کردار پر کیچڑ اچھال رہے ہیں اور ایسا کرنے والوں کو یوں محسوس ہوتا ہے کہ حکومت کی سرپرستی اور حمایت حاصل ہے۔