پاکستان سپر لیگ کے آٹھویں ایڈیشن میں سنسنی خیز مقابلوں کا سلسلہ جاری، کھلاڑیوں کی شاندار پرفارمنس سے شائقین میں بھی جوش و خروش بڑھ گیا، شاہین آفریدی کی گیند پر بابر اعظم کے بولڈ ہونے کی ویڈیو نے سوشل میڈیا پر دھوم مچادی۔
قذافی اسٹیڈیم میں پشاور زلمی اور لاہور قلندر کے میچ میں پشاور زلمی کے کپتان بابر اعظم نے مد مقابل لاہور قلندر کے کپتان شاہین آفریدی کی بال پر ایک شاندار چوکا مارتے ہوئے گیند باؤنڈری سے باہر بھیج دی۔
شاہین نے اگلی گیند پر بابر کو کلین بولڈ کردیا ، کلین بولڈ کی ویڈیو سوشل میڈیا پر وائرل ہونے پر شائقین کرکٹ نے بھرپور پسندیدگی کا اظہار کیا۔
اس حوالے سے لاہور قلندرز کے کپتان شاہین شاہ آفریدی نے کہا کہ بابر ایک ورلڈ کلاس کھلاڑی اور پورے پاکستان کا فیورٹ ہے، میں جب بھی نیٹ پر بابر اور رضوان کو بولنگ کرتا ہوں تو مزہ آتا ہے، انہیں بولنگ کرنا چیلنجنگ ہوتا ہے۔
شاہین نے کہا کہ پی ایس ایل 8 اچھا جا رہا ہے، ہوم گراؤنڈ پر کھیلنے کے لیے پُرجوش ہیں، ابھی تین میچز ہوئے ہیں ہم نے اب تک اچھے رنز کیے، آگے بھی اچھا کھیل پیش کرنے کی کوشش کرینگے۔