صدر مملکت عارف علوی نے چیف الیکشن کمشنر سکندر سلطان راجہ کو انتخابات سے متعلق ہنگامی اجلاس کی دعوت دے دی۔
اس ضمن میں صدر عارف علوی کی جانب سے چیف الیکشن کمیشنر کو خط لکھا گیا ہے۔
خط میں کہا گیا ہے کہ صدر مملکت عام انتخابات کی تاریخوں کا اعلان کمیشن سے مشاورت کے بعد کریں گے۔ اس معاملے پر لاہور ہائیکورٹ کے فیصلے اور سپریم کورٹ کے حالیہ مشاہدات جیسی کچھ اہم پیشرفت ہوئی ہے۔
صدر نے خط میں الیکشن کمیشن کی جانب سے بے حسی پر ناراضگی کا اظہار کرتے ہوئے کہا ہے کہ الیکشن کمیشن نے ابھی تک پہلے خط کا جواب نہیں دیا۔
خط میں کہا گیا ہے کہ بے چینی سے انتظار کر رہا تھا کہ کمیشن اپنے آئینی فرائض کا احساس کرکے اس کے مطابق کام کرے گا۔
انہوں نے کہا کہ اہم معاملے پر الیکشن کمیشن کے افسوسناک رویے سے مایوسی ہوئی ، اپنی آئینی ذمہ داری کا احساس کرتے ہوئے چیف الیکشن کمشنر کوانتخابات پر مشاورت کیلئے ملاقات کیلئے مدعو کرتا ہوں۔