سابق آرمی چیف قمر جاوید باجوہ نے کہا ہے کہ اگر عمران خان وزیراعظم رہتے تو پاکستان کی تباہی کا باعث بنتا۔
بھارتی میڈیا رپورٹ کے مطابق سابق آرمی چیف قمر جاوید باجوہ نے کہا ہے کہ پاکستان تحریک انصاف کی حکومت ملک کے لیے خطرہ تھی۔
سابق آرمی چیف نے دعویٰ کیا کہ اگر عمران خان وزیراعظم کے عہدے پر رہتے تو پاکستان نہ رہتا کیونکہ یہ ملک کی حتمی تباہی کا باعث بنتا۔
انڈیا ٹوڈے کی رپورٹ کے مطابق معروف صحافی جاوید چوہدری کے ساتھ گفتگو میں سابق آرمی چیف قمر جاوید باجوہ نے الزام لگایا کہ کابینہ کے اجلاس کے دوران عمران خان نے سعودی ولی عہد محمد بن سلمان کیلئے بے ہودہ الفاظ کا استعمال کیا۔
جنرل باجوہ کے مطابق یہ بات اسلام آباد میں سعودی سفیر کو پی ٹی آئی کے ایک وزیرنے بتائی تاہم سابق آرمی چیف نے وزیر کی شناخت ظاہر نہیں کی۔
جاوید چوہدری کے مطابق انہوں نے جنرل باجوہ سے عمران خان کی حکومت ختم ہونے کے بعد استعفوں سے روکنے کا پوچھا تو جنرل باجوہ نے کہا کہ میں نے عمران خان سے کہا تھا کہ آپ نے صرف ایک میچ ہارا ہے، سیریز ابھی باقی ہے جس میں آپ مقابلہ کر سکتے ہیں۔
جنرل باجوہ کے مطابق انہوں نے عمران خان کو مطلع کیا کہ پارلیمنٹ میں پی ٹی آئی پارٹی اور پی ڈی ایم کے درمیان صرف دو ووٹوں کا معمولی فرق ہے۔
انہوں نے بنگلہ دیش میں خالدہ ضیاء کی مثال دیتے ہوئے عمران خان کو قومی اسمبلی سے استعفیٰ نہ دینے کا مشورہ دیا جن کی سیاسی جماعت کو ایسا ہی فیصلہ کرنے کے بعد کافی نقصان پہنچا۔
ریٹائرڈ آرمی چیف نے پارلیمنٹ میں رہنے کی اہمیت اور مستقبل میں دوبارہ حکومت بنانے کے امکان پر زور دیا۔ یہ پیغام موصول ہونے کے باوجود عمران خان نے کوئی جواب نہیں دیا ۔
جب عمران خان کی حکومت کے گرنے کی وجوہات کے بارے میں پوچھا گیا توقمر جاوید باجوہ نے کسی بھی قسم کی شمولیت کی تردید کی اور دعویٰ کیا کہ ان کا واحد قصور حکومت کو نہ بچانا تھا، جنرل باجوہ کہتے ہیں کہ عمران خان خود چاہتے تھے کہ وہ مداخلت کریں تاہم اس دعوے کی تائید کے لیے کوئی ثبوت فراہم نہیں کیا گیا۔
جاوید چوہدری نے جنرل باجوہ سے سوال کیا کہ انہوں نے پی ٹی آئی کی حکومت کو کیوں نہیں بچایا حالانکہ وہ ماضی میں ایسا کر چکے ہیں۔
اس پر جنرل باجوہ نے جواب دیا کہ اگر وہ اپنے مفاد میں کام کرتے تو عمران خان کی حمایت جاری رکھتے اور وقار کے ساتھ ریٹائر ہوتے لیکن انہوں نے اس کے بجائے ملک کی بھلائی کے لیے اپنی ساکھ قربان کرنے کا انتخاب کیا۔