گرم استری اگر چند سیکنڈ بھی کپڑوں پر چھوڑ دی جائے تو کپڑے پر کالے دھبے پڑ جاتے ہیں۔ اس آرٹیکل میں “ہماری ویب“ کے قارئین کو کپڑوں پر سے استری کے داغ ہٹانے کے ٹوٹکے بتائے جائیں گے۔

گرم پانی اور بلیچ

جیسے ہی کپڑے پر داغ لگنے کا خطرہ محسوس ہو استری کپڑے سے ہٹا کر بند کردیں اور کپڑے کو گرم پانی میں ڈال دیں۔اگر کپڑے کے لیبل پر بلیچ سے دھونے کے لئے منع نہ کیا گیا ہو تو پانی میں بلیچ حل کرکے کپڑے کو پندرہ منٹ کے لئے چھوڑ دیں۔ اور دھو کر دھوپ میں سکھائیں

واشنگ مشین اور ڈٹرجنٹ

اگر بلیچ سے داغ نہ نکلے تو کپڑے کو واشنگ مشین میں بہترین ڈٹرجنٹ کے ساتھ ڈال دیں اور مشین چلا دیں۔ اس سے اگر داغ مکمل نہ بھی گیا تو ہلکا ضرور ہوجائے گا

ہائڈروجن پر آکسائڈ

ہائیڈروجن پراوکسائڈ بازار میں سستے داموں میں مل جاتا ہے۔ داغ والے کپڑے کو اس طرح رکھیں کہ داغ اوپر دکھائی دے اور اس کے اوپر ہائیڈروجن پرآکسائیڈ سے بھیگا کپڑا رکھیں اور اس کے اوپر ایک خشک کپڑے کا ٹکڑا۔ اب گرم استری (بہت زیادہ گرم نہ ہو) کو خشک کپڑے پر پھیریں۔ تین چار بار اس طرح کریں۔ اس سے سب سے نیچے موجود داغ والا کپڑا اپنے داغ کا نشان چھوڑنے لگے گا

سفید سرکہ

ایک کپڑے کے ٹکڑے یا اسفج کو پندرہ منٹ سفید سرکے میں بھگو کر قمیض کا دھبا اس سے صاف کریں۔ یاد رکھیں سرکہ سرخ یا سیب کا نہیں ہونا چاہئیے ورنہ وہ قمیض کو مزید داغدار کردے گا۔

لیموں

دھبے والے کپڑے پر لیموں کا رس لگائیں اور ٹب میں گرم پانی بھر کے آدھے گھنٹے تک چھوڑ دیں۔ اس کے بعد معمول کی طرح دھو کر دھوپ میں سکھائیں۔ دھوپ میں سکھانے سے کپڑے کے معمولی داغ تھوڑے کم ہوجاتے ہیں۔

نیل فائلر

کچھ داغ کھرچ کر بھی صاف کیسے جاسکتے ہیں۔ نیل فائلر اس سلسلے میں بہترین ہے۔ فائلر کو داغ والے حصے پر مناسب انداز میں رگڑیں۔ بہت ممکن ہے داغ صاف ہوجائے گا۔

اگر داغ نہ جائے تو

اگر داغ دھبے ہوں گے ت ان ٹوٹکوں سے نکل جائیں گے لیکن اگر کپڑا جل چکا ہے تو بھی فکر کی بات نہیں۔ اس کپڑے پر کوئی ربن، ایمبرائیڈری پیچ یا بیل لگا کر جلا ہوا حصہ چھپایا جاسکتا ہے۔ اگر مردوں کی قمیض جل جائے تو اس پر کوئی کارٹون پیچ لگا کر اسے بچوں کے کپڑوں میں شامل کیا جاسکتا ہے