کیا ہم عورتیں نہیں ہماری کوئی عزت نہیں ۔۔ اسمبلی اجلاس میں زخمی ہونے والی خاتون برس پڑیں

قومی اسمبلی میں ہونے والی ہنگامہ آرائی کے نتیجے میں پی ٹی آئی کی زخمی ہونے والی خاتون رہنما ملیکہ بخاری نے زرتاج گل کے ہمراہ پریس کانفرنس کی اور اپوزیشن کا آڑھے ہاتھوں لیتے ہوئے کہا کہ کل جو پارلیمان میں ہوا بہت افسوسناک ہے اور کل میری زاتی تذلیل ہوئی ہے، خاتون رہنما پر کتاب پھینکی گئی اور گالیاں دیں گئیں لیکن یہ ن لیگ کیلئے کوئی نئی بات نہیں ہے۔

کیونکہ ہنگامہ آرائی کرنے والے اس جماعت کے رکن ہیں جنہوں نے ماڈل ٹاون کا سانحہ کروایا، ہم جانتے ہیں کہ شیریں مزاری کے ساتھ کیا کیا؟ ہم جانتے ہیں کہ محترمہ بینظیر بھٹو کے ساتھ کیا کیا ؟ اور جب محترمہ بینظیر بھٹو پارلیمان میں آتیں تھیں تو انہیں کن القابات سے نوازا جاتا تھا۔

ملیکہ بخاری نے ن لیگ پر عورت کارڈ کھیلنے کا الزام لگایا اور کہا کہ پانامہ کیس میں بننے والی جے آئی ٹی کے سامنے مریم نواز پیش نہیں ہوتیں تھیں کیونکہ وہاں سوال مردوں نے پوچھنے ہوتے تھے اور کہتے ہیں کہ مریم کو یہ نہ کہو تو وہ نہ کہو، تو کیا ہم عورتیں نہیں، ہماری کوئی عزت نہیں۔

ادھر وفاقی وزیر برائے ماحولیاتی تبدیلی زرتاج گل نے بھی اپوزیشن پر کڑی تنقید کی اور کہا کہ خواتین پر تنقید کرنا ن لیگ کا وطیرہ بن گیا ہے اور انکے اس عمل سے کوئی بھی خاتون رکن پارلیمینٹ محفوظ نہیں اور اسمبلی اجلاس میں ن لیگ نے خواتین سے متعلق بد زبانی اور ہلڑ بازی کی اور کہا کہ ن لیگ بد تمیزوں اور ہلڑ بازوں کی جماعت بن گئی ہے۔

زرتاج گل نے یہ الزام بھی عائد کیا ہے کہ بیواؤں، یتیموں کی زمینوں پر قبضہ کرنے والوں کو پارلیمیٹ میں چھوڑ دیا گیا ہے اور ساتھ ہی ساتھ یہ بھی کہہ ڈالا کہ رات 3 بجے قانون سازی کرنے والے کو ن لیگ نے اپنا ترجمان بنا دیا ہے۔