کرونا کا پھر سے وار، ترکی میں کرفیو کا اعلان

ترکی میں کرونا کے بڑھتے کیسز اور اموات کی بنا پر ترک حکومت نے ویک اینڈز پر کرفیو کا اعلان کردیا ، کیفے ، ریسٹورنٹ اور تفریحی مقامات کھولنے پر سخت کاروائی کی جائے گی۔

تفصیلات کے مطابق ترکی میں حکومت نے ویک اینڈز پر تمام ریسٹورنٹ کیفے اور دیگر تفریحی مقامات کھولنے پر پابندی عائد کردی ہے ، جبکہ عام دنوں میں اسکولز کھولنے پر بھی پابندی عائد ہے تمام اسکولز میں سال کے اختتام تک آن لائن تعلیم دی جائے گی۔

کرونا کی تباہ کاریوں پر تشویش کا اظہار کرتے ہوئے ترک صدر طیب اردوان نے کہا کہ اس وقت ترکی تشویشناک صورتحال سے گزر رہا ہے ، کرونا کے کیسز اور اس سے اموات خطرناک حد تک بڑھ گئی ہیں،انہوں نے ویک اینڈز پر پابندی عائد کرتے ہوئے بتایا کہ رات 8 سے صبح 10 بجے تک کرفیو ہوگا انہوں نے واضح کیا کہ اگر کرونا پر قابو نہ پاسکے تو پابندیاں مزید سخت کردی جائیں گی ۔

واضح رہے کے ترکی میں کرونا سے متاثر ہونے والوں کی تعداد چار لاکھ اکیس ہزار سے تجاوز کرگئی ہے جبکہ اموات گیارہ ہزار سے زائد ہیں۔