امریکا میں صدارتی انتخابات کل ہونے جارہے ہیں جس کی تیاریاں مکمل کرلی گئی ہیں، اَمریکی صدر ٹرمپ اور ان کے مخالف اُمیدوار جوبائیڈن نے اپنی اپنی الیکشن مہم بھی مکمل کرلی ہے اور دونوں کل کے دن کے بعد نتائج کا اِنتظار کریں گے۔
لیکن اِس سے قبل سنہ 1984ء سے اَب تک تمام اِنتخابات کی درست پیشگوئی کرنے والے معروف تاریخ دان اور پروفیسر ایلن لیکمین میدان میں آگئے ہیں،اِس بار انہوں نے امریکی صدارت کے لئے جوبائیڈن کا نام حتمی بتا دیا ہے اور ڈونلڈ ٹرمپ کی شکست کی پیشگوئی کی ہے۔ جبکہ اس سے قبل سال 2016 کے الیکشن میں ایلن لیکمین نے ٹرمپ کی کامیابی کی پیشگوئی کی تھی جو درست ثابت ہوئی تھی۔
غیر ملکی ٹی وی چینل فاکس نیوز کے مطابق امریکی یونیورسٹی کے پروفیسر ایلن لیکمین نے وائٹ ہاﺅس ماڈل کے لئے 13 اُصول بنائے ہیں جن کو دیکھتے ہوئے وہ اَندازہ لگاتے ہیں اور پھر اِلیکشن کے نتائج کی پیشگوئی کرتے ہیں، انہیں اصولوں کو سامنے رکھتے ہوئے پروفیسر ایلن لیکمین نے جوبائیڈن کی جیت کی پیشگوئی کر دی ہے۔
یہ امر قابل ذکر ہے کہ اُن اصولوں کے مطابق جو حساب لگایا جاتا ہے وہ مکمل طور پر موجودہ حکومت کی کارکردگی کے مطابق ہوتا ہے کہ یہ دوبارہ وائٹ ہاﺅس حاصل کرنے میں کامیاب ہوں گے یا پھر اپوزیشن سے شکست کا سامنا ہوگا۔
یہ اُصول مختلف موضوعات کا احاطہ کرتے ہیں جن میں حکومت کے خلاف سامنے آنے والے سکینڈلز، پارٹی کا اپنے نمائندوں پر کنٹرول، معیشت کی حالت، سماجی بے چینی، غیر ملکی فوجی کامیابیاں اور ناکامیوں سمیت دیگر چیزیں شامل ہیں۔
ایلن لیکمین نے اپنی پیشگوئی کے حق میں دلائل دیتے ہوئے کہا کہ ٹرمپ حکومت کی دوبارہ کامیابی اِس چیز پر منحصر نہیں ہوتی کہ اُنہوں نے اِلیکشن مہم کتنی اچھی چلائی بلکہ گورننس اہمیت رکھتی ہے۔ ایلن لیکمین کے مطابق ان اُصولوں (keys) میں سے چھ جس اُمیدوار کے حق میں ہوں گے وہ اِلیکشن میں کامیابی حاصل کرے گا جبکہ الیکشن مہم کے دوران کئے جانے والے تبصروں اور اِنتخابی مہم کو رائے دہندگان کی جانب سے مسترد کر دیا جاتا ہے۔