دنیا بھر میں کورونا وائرس سے پھیلنے والی بیماری کووڈ انیس کے اثرات اور خطرات کے بادل تاحال منڈلا رہے ہیں۔ تاہم عالمی ادارہ صحت اپنے متعدد بیانات میں کہہ چکا ہے کہ اس وبا پر مکمل طور پر قابو پانے کے لئے سال سے زیادہ کا وقت درکار ہے۔
دوسری جانب کوورنا وائرس کے پیشِ نظر عالمی ادارہ صحت (ڈبلیو ایچ او) کی جانب سے بڑا اعلان سامنے آیا ہے جس میں وہ کم قیمت میں کووڈ 19 ٹیسٹنگ کٹس ترقی پذیر ممالک کو فراہم کرے گا۔
غیرملکی خبررساں ادارے کی رپورٹ کے مطابق یہ کٹس 15 منٹ میں کورونا انفیکشن کی تشخیص کریں گی اور سستی اور جلد نتائج دینے والی کورونا ٹیسٹنگ کٹس ان ممالک کو فراہم کی جائیں گی جو غریب اور متوسط ہیں، صرف 5 ڈالر (829 روپے) کا یہ اینٹی جین ٹیسٹ وائرس کے جینیاتی مواد کی بجائے اس کے باہری عناصر کو پکڑ کر وائرس کا پتہ لگا لے گا۔
رپورٹ کے مطابق عالمی ادارہ صحت 12 کروڑ ٹیسٹ کٹس مختلف ممالک کو فراہم کرے گا، ٹیسٹنگ کٹس جنوبی کوریا کے ایس ڈی بائیو سنسر اور امریکا کی کمپنی ایبٹ نے تیار کی ہیں۔
ترقی پذیر ممالک کو عالمی ادارہ صحت کے گلوبل فنڈ سے 5 کروڑ ڈالرز بھی مہیا کئے جائیں گے تاکہ مذکورہ ممالک ان ٹیسٹوں کو خرید سکیں جن کے اولین آرڈر رواں ہفتے دئے جانے کا امکان ہے۔
واضح رہے کہ کورونا وبا کے باعث ہلاکتوں کا سلسلہ اب تک جاری ہے اور پاکستان کے مخلتف شہروں میں کورونا وائرس کے کے کیسز میں اضافہ بھی دیکھنے میں آیا ہے۔