اسمارٹ فون ہماری روز مرہ زندگی کا ایک اہم حصہ بن چکا ہے اور اس کا استعمال بھی لامحدود حد تک کیا جاتا ہے۔ اسمارٹ فونز کا استعمال تو اب بہت عام ہوگیا ہے اور کئی افراد کے پاس مختلف کمپنیوں کی یہ ڈیوائسز موجود ہیں۔
مگر کیا آپ کو ایسا محسوس ہوتا ہے کہ اسمارٹ فونز کی زندگی ایک یا 2 سال سے زیادہ نہیں ہوتی جس کے بعد متعدد مسائل کا سامنا درپیش ہوتا ہے۔
درحقیقت اکثر افراد چند ایسی غلطیاں کرتے ہیں جو بظاہر نقصان دہ تو نہیں ہوتیں مگر اسمارٹ فونز کی زندگی کو مختصر کرنے کا سبب بن جاتی ہیں۔
اور یہ بتانے کی ضرورت نہیں کہ نیا فون سستا نہیں ہوتا تو اس لیے ہر ایک کی خواہش ہوتی ہے کہ جب تک ممکن ہو اسے استعمال کیا جائے، اگر آپ کی بھی خواہش ہے کہ تو ان غلطیوں سے بچیں جو فونز کی زندگی کے لئے تباہ کن ہوتی ہیں۔
1- نوٹیفکیشنز کے لئے اسمارٹ فون میں وائبریشن موڈ کو ترجیح دینا
ماہرین کے مطابق اسمارٹ فونز میں موجود کچھ فیچرز جیسے وائبریٹنگ نوٹیفکیشنز کے نتیجے میں فون کے لئے کام کرنا مشکل ہوجاتا ہے، کیونکہ اس سے فون کو غیر ضروری کاموں کے لئے بھی مکمل گنجائش کے ساتھ کام کرنا پڑتا ہے۔ نوٹیفکیشنز کے لئے وائبریشن موڈ کے زیادہ استعمال سے اس کی افادیت کم ہونے لگتی ہے۔
2- غیر استعمال شدہ ایپس جن کو استعمال نہیں کرتے
آئی فون ہو یا کوئی اینڈرائیڈ ڈیوائس، ایسی ایپس جن کو استعمال نہیں کیا جاتا ہے یعنی غیر استعمال شدہ ایپس، وہ بیٹری لائف کو چوستے ہیں، مثال کے طور پر آپ ایک ایپ کو صرف ایک بار کھولتے ہیں اور پھر اسے کبھی دوبارہ استعمال نہیں کرتے، تو یہ ایپ ممکنہ طور پر پس منظر میں کام کرتی رہتی ہے۔
تو بہتر ہے کہ ایسی ایپس جن کو استعمال نہیں کرتے ان کو ڈیلیٹ کردیں۔
3- بیٹری کو چوسنے والی ایپس
کچھ ایپس ایسی ہوتی ہیں جو بیٹری کو بہت جلد ختم کرتی ہیں جن میں اسنیپ چیٹ، گوگل میپس، نیٹ فلیکس اور فیس بک قابل ذکر ہیں۔
دی گارڈین کے مطابق صرف فیس بک ایپ کو اینڈرائیڈ سے ڈیلیٹ کرکے بیٹری لائف کو 20 فیصد بہتر بنایا جاسکتا ہے جبکہ فیس بک میسنجر ایپ سے بھی چھٹکارا پالیں تو دیگر ایپس کا لوڈ ٹائم 15 فیصد تیز ہوسکتا ہے۔
فیس بک خاص طور پر بیٹری لائف کو زیادہ تیزی سے ختم کرتی ہے کیونکہ اس کو استعمال نہ بھی کریں تو بھی یہ بیک گراؤنڈ میں کام کرتی رہتی ہے۔
4- بہت زیادہ برائٹ اسکرین
اب وہ دن ختم ہوگئے جب فون کی اسکرین بہت چھوٹی ہوتی تھی مگر آپ کو یہ سمجھنے کی ضرورت ہے کہ یہ بڑی اسکرینیں فون بیٹری کی سب سے بڑی دشمن ہیں۔
اس لیے ضروری ہے کہ ڈسپلے مینیو میں اڈاپٹو برائٹنس کو ٹرن آن کردیں، جس سے فون کو اسکرین برائٹنس ماحول کے مطابق ایڈجسٹ کرنے میں مدد ملے گی۔
5- اپنے بستر یا تکئے کے نیچچے رکھنا
سوتے وقت فون کو تکئے کے نیچے رکھنا بھی اس کی زندگی کو مختصر کرسکتا ہے جس کی وجہ اس ڈیوائس میں پیدا ہونے والی حرارت ہے۔
6- فون کو چارجنگ کیبل پر لگا چھوڑ دینا
اپنے فون کو بیٹری فل ہونے پر بھی چارجر سے نہ نکالنا اس کی بیٹری کی زندگی کو نقصان پہنچانے کا باعث بن سکتا ہے، ایسا نہیں کہ فون میں پاور اوور لوڈ ہوجائے گی بلکہ حرارت بیٹری کو نقصان پہنچاسکتی ہے، خاص طور پر اگر آپ کی چارجنگ کیبل خراب ہو۔
7- رات بھر موبائل کی چارجنگ
صبح اٹھنے پر مکمل چارج فون کا خیال بظاہر تو اچھا ہے مگر رات بھر کے لئے ڈیوائس مستقل چارجنگ کے لئے چھوڑ دینا نقصان دہ ہوتا ہے۔
جب فون سو فیصد مکمل چارج ہو جاتا ہے تو بھی ٹریکل چارج کا سلسلہ جاری رہتا ہے، یہ اضافی چارج بیٹری کو نان اسٹاپ کام کرنے پر مجبور کرتا ہے، بہتر تو یہ ہے کہ لیتھیم آئیون بیٹری کو مکمل چارج نہ کریں کیونکہ زیادہ والٹیج بیٹری پر دباؤ بڑھاتا ہے اور وقت کے ساتھ کارکردگی خراب ہوجاتی ہے۔
8- ایک مخصوص چارجر سے موبائل چارج کریں
اکثر و بیشتر اوقات ہم ایسا کرتے ہیں کہ اپنے موبائل کو کسی دوسری کمپنی والے موبائل کے چارجر سے اپنا موبائل چارج کرتے ہیں تو ایسا ہر گز نہ کریں۔ کوشش کریں کہ اپنے موبائل کے اصل چارجر سے موبائل کو چارج کریں اس سے بیٹری کو کوئی خطرہ نہیں پہچنے گا۔