عالمی وبا کورونا وائرس کے پھیلنے کے 6 ماہ بعد سائنسدانوں میں اس کے پھیلاﺅ کے اسباب پر اتفاق بڑھ رہا ہے۔ اس سےقبل کورونا کے پھیلاﺅ کی بعض وجوہات پر ماہرین میں تضاد تھا لیکن اب متعدد ماہرین ایک بات پر متفق ہو چکے ہیں کہ کورونا وائرس کی مختلف سطحوں، مثلاً میز، کرسی اور پارسلز وغیرہ سے پھیلنے کا امکان انتہائی کم ہے۔ اس کے علاوہ محض بازاروں میں گھومنے اور لوگوں سے چند لمحے کی ملاقات یا گفتگو سے بھی یہ بہت کم پھیلتا ہے۔
وال سٹریٹ جرنل کے مطابق ماہرین اس بات پر متفق ہو گئے ہیں کہ کورونا وائرس لوگوں کے تادیر بہت زیادہ قریب رہنے، طویل ملاقات اور گفتگو، پرہجوم تقریبات اور ان مقامات سے زیادہ پھیلتا ہے جہاں ہوا کی آمد و اخراج کا خاطر خواہ انتظام نہ ہو۔
ماہرین کے مطابق اگر لوگ دوسروں سے طویل ملاقات اور گفتگو سے گریز کریں، اور ایسے ریسٹورینٹس اور دیگر جگہوں پر نہ جائیں جن کے ایئر کنڈیشنڈ ہالز ہوں اور وہاں ہوا کی آمدو رفت کا انتظام نہ ہو اور کنسرٹس اور دیگر ایسی پرہجوم جگہوں پر نہ جائیں جہاں انہیں زیادہ دیر تک لوگوں کے درمیان رہنا پڑے تو انہیں وائرس لاحق ہونے کا خطرہ نہیں ہوتا۔ بازاروں میں جانے اورکسی سے مختصر گفتگو کرنا زیادہ خطرناک نہیں ہے۔
رپورٹ کے مطابق ماہرین کا کہنا تھا کہ پہلے دستیاب معلومات کے مطابق لاک ڈاﺅن کرنا اور لوگوں کو گھروں تک محدود کر دینا درست تھا لیکن اب ان نئی معلومات سے علم ہوا ہے کہ لوگوں کو گھروں سے نکلنے کی آزادی دے کر بھی وائرس کے پھیلاﺅ کو روکا جا سکتا ہے۔