لاہور کے علاقے راوی ٹاؤن میں افسوس ناک منظر دیکھنے میں آیا جب کم عمر بہن بھائی میں کورونا وائرس کی تشخیص ہوئی اور انہیں قرنطینہ میں رکھنے کے لیے اسپتال لے جایا گیا۔
تفصیلات کے مطابق بچوں کے والد میں بھی دو روز قبل کورونا کا ٹیسٹ مثبت آیا تھا جس کے بعد ان کے تمام گھر والوں کے ٹیسٹ کیے گئے۔ بچوں میں ہلکی کھانسی اور بخار تھا جس کے باعث ان کا ٹیسٹ کیا گیا۔
ڈی ڈی ایچ او ڈاکٹر نادیہ کے مطابق بچوں میں کورونا وائرس کی تشخیص ہوئی تاہم والدہ کا کورونا ٹیسٹ منفی آیا ہے۔
بچوں کو اسپتال لے جانے کے لیے جب ایمبولنس ان کے گھر پہنچی تو وہاں کے منظر نے ہر کسی کو اشک بار کر دیا۔ بچوں کی والدہ شدید کرب میں روتی رہیں جبکہ بچوں کو کپڑے، کھانے پینے کی چیزیں اور ہاتھ میں قرآن پاک بھی تھما دیا۔
دونوں بچوں کو چلڈرن اسپتال منتقل کیا گیا ہے جبکہ بچوں کے والد میو اسپتال میں زیر علاج ہیں۔