چئیرمین پیپلزپارٹی بلاول بھٹو کی ہمشیرہ بختاور بھٹو زرداری نے وزیراعظم پاکستان عمران خان کی پریشانیوں کی طویل فہرست گنوا دی۔
سماجی رابطے کی ویب سائٹ ٹوئٹر پر بختاور بھٹو زرداری نے ٹوئٹ کیا جس میں انہوں نے طنزیہ سوالات کے انبار لگا دیے۔ ان کا کہنا تھا کہ 'ہمارے کٹھ پتلی وزیرِاعظم کیوں پریشان ہیں؟ کیا وہ اپنی غیر معمولی کارکردگی کی وجہ سے پریشان ہیں؟ کیا وزیراعظم غریبوں کی تعداد میں 18 ملین افراد کے اضافے سے پریشان ہیں؟
بختاور نے مزید لِکھا کہ 'وزیراعظم کشمیر کے نقصان سے پریشان ہیں؟ کیا وزیراعظم اعترافی مجرم احسان اللّٰہ احسان کے فرار سے پریشان ہیں؟'
تاہم بختاور نے ان سب سوالات کا خود ہی جواب دیتے ہوئے تحریر کیا کہ 'نہیں، وزیراعظم مستقل مہنگائی کے خلاف اپنے مؤقف اور بڑھتی غربت سے پریشان ہیں'۔
بختاور بھٹو زرداری کا کہنا تھا کہ 'پی ٹی آئی کے اسٹرانگ مین نیب نے بلاول کو پھر بلالیا ہے۔ وہی نیب جو عدلیہ اور منتخب نمائندوں سے بالاتر ہے'۔
آخر میں بختاور نے سوال اٹھاتے ہوئے لکھا کہ 'اصل مجرم، بھگوڑے اور کرپٹ افراد کو کب قانون کے کٹہرے میں لایا جائے گا؟ یعنی عمران خان، ان کی بہن، پوری کابینہ اور پرویز مشرف'۔