وزیرِاعظم عمران خان کی چئیرمین سی پیک اتھارٹی سابق لیفٹیننٹ جنرل عاصم سلیم باجوہ سے اہم ملاقات ہوئی ہے۔
ملاقات کے دوران جنرل عاصم سلیم باجوہ نے عمران خان کو سی پیک منصوبوں میں ہونے والی پیش رفت سے متعلق بتایا۔
واضح رہے چند دِن قبل سماجی رابطے کی ویب سائٹ ٹوئٹر پر جنرل عاصم سلیم باجوہ نے خبر دِی تھی کہ انہوں نے سی پیک کے حوالے سے بریفنگز لیں ہیں جبکہ اسٹیک ہولڈرز سے ملاقاتیں بھی کیں۔ سی پیک پر سب لوگ متفق ہیں۔ ان کا کہنا تھا کہ سی پیک پہلے ہی توانائی اور انفراسٹرکچر کے شعبوں میں ریلیف مہیا کر رہا ہے۔
عاصم سلیم باجوہ کے مطابق سی پیک کے دوسرے مرحلے کی تیاری کا وقت ہوا چاہتا ہے۔ اس منصوبے کے تحت نئے پراجیکٹس کے ذریعے بڑے پیمانے پر ملازمتیں پیدا کی جائیں گی۔ توانائی کے منصوبوں کے حوالے سے لیفٹیننٹ جنرل (ر) عاصم سلیم باجوہ نے بتایا تھا کہ سی پیک کے تحت انرجی کے 9 پراجیکٹس مکمل ہوچکے ہیں جو 5320 میگا واٹ بجلی فراہم کر رہے ہیں۔
انہوں نے بتایا کہ سی پیک کے تحت انرجی کے 8 مزید پراجیکٹس پر کام جاری ہے جو 470،4 میگا واٹ بجلی فراہم کریں گے۔ ان پراجیکٹس پر 55۔9 ارب ڈالر کی لاگت آئے گی اور یہ 15 ہزار 227 پاکستانیوں کو روزگار فراہم کرنے کا باعث بنے گا۔