کہیں ٹھنڈی ہوائیں تو کہیں موسم خشک، کراچی سمیت ملک بھر میں موسم کیسا رہے گا؟ محکمہ موسمیات نے پیش گوئی کردی

رواں سال ملک بھر میں معمول سے زیادہ سردی پڑی ہے جبکہ سردی کا دورانیہ بھی خلافِ معمول رہا۔

جمعے کی صبح سے ہی ملکی دارالحکومت اسلام آباد میں سردی کی شدت میں اضافہ ریکارڈ کیا گیا جبکہ مطلع صاف رہا اور درجہ حرارت 8 ڈگری سینٹی گریڈ ریکارڈ کیا گیا۔

صوبہ خیبرپختونخوا کے بھی چند اضلاع میں موسم سرد اور خشک رہا جبکہ چترال، سوات، دیر اور مالم جبہ میں مطلع ابر آلود رہنے کے سبب موسم شدید سرد رہنے کا امکان ہے۔

تفصیلات کے مطابق پنجاب کے کئی اضلاع میں موسم سرد اور خشک رہے گا۔ آئندہ دو روز تک پنجاب کے متعدد علاقوں میں مطلع جزوی طور پر ابر آلود رہنے کا امکان ہے جبکہ بارش متوقع نہیں ہے۔

شہرِ قائد میں بھی صبح سے سے ٹھنڈی ہواؤں کا راج ہے جس سے سردی میں اضافہ ہوا ہے جبکہ بادلوں کے برسنے کا کوئی امکان نہیں ہے۔

محکمہ موسمیات کے مطابق کراچی میں ہواؤں کا یہ سلسلہ ماہِ فروری کے اختتام تک جاری رہنے کا امکان ہے۔