Getty Imagesنعمان علی کو میچ میں دس وکٹیں لینے پر مین آف دی میچ قرار دیا گیا
لاہور میں کھیلے جانے والے دو ٹیسٹ میچوں کی سیریز کے پہلے کرکٹ میچ میں پاکستان نے جنوبی افریقہ کو 93 رنز سے شکست دے کر سیریز میں ناقابلِ شکست برتری حاصل کر لی ہے۔
پاکستان نے جنوبی افریقہ کو فتح کے لیے 277 رنز کا ہدف دیا تھا لیکن مہمان ٹیم دوسری اننگز میں 183 رنز ہی بنا سکی۔
پاکستان کی جانب سے نعمان علی نے اس میچ میں مجموعی طور پر دس وکٹیں لیں اور انھیں میچ کا بہترین کھلاڑی قرار دیا گیا۔
جمعرات کو میچ کے چوتھے دن جب کھیل شروع ہوا تو جنوبی افریقہ نے دو وکٹوں کے نقصان پر 51 رنز سے اپنی دوسری اننگز دوبارہ شروع کی۔
تاہم اسی سکور پر شاہین آفریدی نے پہلی اننگز میں سنچری بنانے والے ٹونی زورزی کو ایل بی ڈبلیو کر کے جنوبی افریقہ کی مشکلات میں اضافہ کر دیا۔
مہمان ٹیم کا سکور جب 55 تک پہنچا تو اسے چوتھی وکٹ کا نقصان اٹھانا پڑا۔ آؤٹ ہونے والے بلے باز ٹرسٹن سٹبز تھے جنھیں نعمان علی نے سلپ میں کیچ کروایا۔
عمران خان کو ’چھکا مارنے کا چیلنج‘ دینے والے عبدالقادر جو کئی لیگ سپنرز کے استاد بنےپاکستان کی تاریخکا ’سب سے عظیم‘ کرکٹر کون ہے؟کمنٹری کے دوران ’آزاد کشمیر‘ بولنے پر انڈین صارفین کی ثنا میر پر تنقید: ’میرے دل میں بغض نہیں، براہ کرم اس پر سیاست نہ کریں‘پاکستانی اولمپک گولڈ میڈلسٹ ارشد ندیم کے کوچ سلمان بٹ پر تاحیات پابندی کیوں لگائی گئی؟
اس موقع پر اوپنر رکلٹن اور سٹبز کی جگہ لینے والے ڈیوالڈ بریوس نے اننگز کو سنبھالا اور سکور 128 تک پہنچا دیا۔ اس شراکت داری میں رکلٹن نے تو محتاط انداز اپنائے رکھا لیکن بریوس نے جارحانہ انداز میں چھ چوکوں اور دو چھکوں کی مدد سے نصف سنچری بنائی۔
یہ پارٹنر شپ نعمان علی نے بریوس کو بولڈ کر کے توڑی۔ اس نقصان کے بعد جنوبی افریقہ کے بلے باز مزید کوئی بڑی شراکت قائم کرنے میں ناکام رہے اور جہاں مڈل آرڈر نعمان علی اور ساجد خان کی سپن بالنگ کے جال میں جکڑا گیا وہیں ٹیل اینڈرز کے پاس شاہین آفریدی کی فاسٹ بولنگ کا کوئی جواب نہ تھا۔
شاہین آفریدی دوسری اننگز میں صرف آٹھ اوورز میں چار وکٹیں لینے میں کامیاب رہے جبکہ نعمان علی نے بھی دوسری اننگز میں چار جبکہ ساجد خان نے دو وکٹیں حاصل کیں۔
خیال رہے کہ جنوبی افریقہ کی ٹیم اس وقت عالمی ٹیسٹ چیمپیئن ہے اور پاکستان کے خلاف ٹیسٹ سیریز سے اس نے اپنے اعزاز کے دفاع کا آغاز کیا ہے۔
Getty Images
اس میچ کے دوران پاکستانی بلے بازوں کی کارکردگی اتار چڑھاؤ کا شکار رہی۔ پہلی اننگز میں جہاں پاکستان کے چار بلے بازوں نے نصف سنچریاں بنائیں وہیں دوسری اننگز میں وہ ایک بڑا مجموعہ بنانے میں ناکام رہے اور پاکستان کے آخری پانچ بلے باز سکور میں صرف 17 رنز کا اضافہ کر سکے۔
اس کارکردگی پر پاکستان کی دوسری اننگز کے اختتام پر کوچ اظہر محمود بھی نالاں دکھائی دیے اور انھوں نے پریس کانفرنس میں کہا کہ بلے بازوں نے غلط شاٹ سلیکشن سے خود کو مشکل صورتحال میں ڈالا۔
قذافی سٹیڈیم میں پریس کانفرنس کرتے ہوئے اظہر محمود نے کہا تھا کہ میچ کے دوران دو اچھی شراکت داریاں دیکھنے کو ملیں تاہم دوسری اننگز میں اچانک وکٹوں کے گرنے سے مشکلات میں اضافہ ہوا۔ ان کا کہنا تھا کہ 17 رنز کے اندر پانچ وکٹوں کے نقصان کی بنیادی وجہ شاٹ سلیکشن میں کمزوری تھی اور بیٹنگ لائن نے درست فیصلے نہیں کیے۔
’آخری 45 منٹ میں انتہائی بری بیٹنگ کی گئی اور اب ہمیں ایک بری صورتحال کا سامنا ہے‘
تیسرے دن کے کھیل کے بعد جہاں سوشل میڈیا پر صارفین دوبارہ نعمان علی کی تعریف کرتے نظر آئے تو وہیں بہت سے صارفین دوسری اننگز میں پاکستان کی بیٹنگ پر تنقید بھی کر رہے ہیں۔
حمزہ شیخ نے پاکستان کی بیٹنگ کو ناقص قرار دیتے ہوئے لکھا کہ ’پاکستان نے صرف 17 رنز پر اپنی چھ وکٹیں گنوا دیں۔‘
احمر نجیب ستی نے لکھا کہ دوسری اننگز کے ’آخری 45 منٹ میں انتہائی بری بیٹنگ کی گئی اور اب ہمیں ایک بری صورتحال کا سامنا ہے۔‘
ہارون نامی صارف نے لکھا کہ ’کیا صرف مجھے ہی پاکستان کی بیٹنگ پر حیرت ہو رہی ہے؟ تقریباً ہر بیٹسمین نے غلط شاٹس کھیلیں اور وکٹیں گنوا دیں۔ پلان تو یہ ہونا چاہیے تھا کہ چوتھے دن تک کھیلا جاتا اور 400 رنز کی لیڈ دی جاتی۔ ہم اب بھی جیت سکتے ہیں لیکن یہ پاگل پن تھا۔ کوئی منطق یا دماغ کا استعمال نہیں کیا گیا۔‘
پاکستانی اولمپک گولڈ میڈلسٹ ارشد ندیم کے کوچ سلمان بٹ پر تاحیات پابندی کیوں لگائی گئی؟پاکستان کی تاریخکا ’سب سے عظیم‘ کرکٹر کون ہے؟کمنٹری کے دوران ’آزاد کشمیر‘ بولنے پر انڈین صارفین کی ثنا میر پر تنقید: ’میرے دل میں بغض نہیں، براہ کرم اس پر سیاست نہ کریں‘الیکٹریشن کا بیٹا جس نے انڈیا کو ایشیا کپ جتوایا: ’میں چاہتا تھا تِلک ورما ڈاکٹر بنے، مگر وہ کرکٹر بن کر دُنیا میں پہچان بنانا چاہتا تھا‘عمران خان کو ’چھکا مارنے کا چیلنج‘ دینے والے عبدالقادر جو کئی لیگ سپنرز کے استاد بنے