سرکاری حج اسکیم کے تحت درخواستوں اور اخراجات کی پہلی قسط کی ادائیگی کا مرحلہ مکمل ہو گیا ہے جس کے بعد وزارت مذہبی امور نے مزید حج درخواستیں وصول کرنا بند کر دی ہیں۔
ترجمان وزارت کے مطابق بدھ کے روز تک سرکاری ایک لاکھ 20 ہزار کے کوٹے میں ڈیڑھ ہزار درخواستوں کی گنجائش باقی تھی جو جمعرات کو مکمل ہو گئی اور اس کے ساتھ ہی وزارت کا پورٹل بھی بند کر دیا گیا۔
اب پاکستانی عازمین حج صرف پرائیویٹ حج آپریٹرز کے ذریعے درخواست دے سکیں گے جن کے پاس 60 ہزار حجاج کا کوٹہ موجود ہے۔ حج واجبات کی ادائیگی کا دوسرا مرحلہ یکم نومبر سے شروع ہوگا۔
واضح رہے کہ سرکاری اسکیم کے تحت حج درخواستوں کی وصولی تین ہفتے سے زائد جاری رہی جبکہ گزشتہ برس تقریباً 70 ہزار پاکستانی حج کی سعادت سے محروم رہ گئے تھے جس کے باعث اس سال درخواستوں اور پہلی قسط کی وصولی کا عمل فوری طور پر حج کے بعد ہی شروع کر دیا گیا تھا۔