پاکستان کی فوج کے سربراہ فیلڈ مارشل عاصم منیر نے کہا ہے کہ پاکستان نے انڈیا کی امتیازی اور دوغلی پالیسیوں کے خلاف کامیاب سفارتی جنگ لڑی ہے۔پاکستانی فوج کے شعبہ تعلقات عامہ (آئی ایس پی آر) کی جانب سے اتوار کو جاری ہونے والے بیان کے مطابق دورہ امریکہ کے دوران فیلڈ مارشل عاصم منیر نے پاکستانی کمیونٹی سے خطاب کرتے ہوئے کہا کہ انڈیا اپنے آپ کو ’وشوا گرو‘ کے طور پر پیش کرنا چاہتا ہے، لیکن عملی طور پر ایسا کچھ بھی نہیں۔
انہوں نے کہا کہ ’انڈیا کی خفیہ ایجنسی را کی ٹرانس نیشنل دہشت گرد سرگرمیوں میں شمولیت عالمی سطح پر شدید تشویش کا باعث ہے۔ اس کی مثالیں کینیڈا میں سکھ رہنما کا قتل، قطر میں آٹھ انڈین نیول افسران کا معاملہ اور کلبھوشن یادو جیسے واقعات ہیں۔‘
فیلڈ مارشل نے انڈیا اور پاکستان کی حالیہ جنگ کے حوالے سے کہا کہ ’حالیہ انڈین جارحیت، جو شرمناک بہانوں کے ساتھ کی گئی، نے پاکستان کی خودمختاری کی سنگین خلاف ورزی کی اور معصوم شہریوں کو شہید کیا۔ اس انڈین جارحیت نے خطے کو ایک خطرناک طور پر بھڑکنے والی جنگ کے دہانے پر لا کھڑا کیا، جہاں کسی بھی غلطی کی وجہ سے دو طرفہ تصادم بہت بڑی غلطی ہو گی۔‘فیلڈ مارشل عاصم منیر نے کہا کہ پاکستان نے اس اشتعال انگیزی کا پُرعزم اور بھرپور جواب دیا، اور وسیع تر تنازع کو روکنے میں کامیابی حاصل کی۔ان کا کہنا تھا کہ ’پاکستان صدر ٹرمپ کا انتہائی مشکور ہے جن کی سٹریٹجک لیڈشپ کی بدولت نا صرف انڈیا پاکستان جنگ رکی بلکہ دنیا میں جاری بہت سی جنگوں کو روکا گیا ہے۔‘عاصم منیر نے کہا کہ انڈیا اب بھی خطے میں عدم استحکام پیدا کرنے پر بضد ہے، لیکن پاکستان واضح کر چکا ہے کہ کسی بھی انڈین جارحیت کا منہ توڑ جواب دیا جائے گا۔انہوں نے کشمیر کے حوالے سے انڈیا کے روایتی موقف کو مسترد کرتے ہوئے کہا کہ ’مقبوضہ کشمیر انڈیا کا کوئی اندرونی معاملہ نہیں بلکہ ایک نامکمل بین الاقوامی ایجنڈا ہے۔ جیسا کے قائداعظم نے کہا تھا کشمیر پاکستان کی ’شہ رگ‘ ہے۔‘’مقبوضہ کشمیر پر اقوامِ متحدہ کی سلامتی کونسل کی قراردادیں بھی موجود ہیں، اور پاکستان ان قراردادوں کی مکمل حمایت کرتا ہے۔‘فیلڈ مارشل عاصم منیر نے کہا کہ ’مقبوضہ کشمیر پر اقوامِ متحدہ کی قراردادیں بھی موجود ہیں، اور پاکستان ان قراردادوں کی مکمل حمایت کرتا ہے۔‘ (فوٹو: آئی ایس پی آر)فیلڈ مارشل نے امریکہ میں مقیم پاکستانیوں کے حوالے سے کہا کہ ان سے خطاب کرنا میرے لیے اعزاز کی بات ہے۔ بیرون ملک مقیم پاکستانی عزت و وقار کا سرچشمہ اور دیگر پاکستانیوں کی طرح پرجوش ہیں۔ بیرون ملک پاکستانی ’برین ڈرین نہیں بلکہ برین گین‘ ہے۔پاکستان اور امریکہ کے بہتر ہوتے تعلقات کے حوالے سے ان کا کہنا تھا کہ محض ڈیڑھ ماہ کے وقفے کے بعد میرا دوسرا دورہ امریکہ تعلقات کے حوالے سے ایک نئی جہت کی علامت ہے۔ ان دوروں کا مقصد تعلقات کو ایک تعمیری، پائیدار اور مثبت راستے پر گامزن کرنا ہے۔’امریکہ کے ساتھ ممکنہ تجارتی معاہدے کی بدولت بھاری سرمایہ کاری متوقع ہے۔ امریکہ، سعودی عرب، متحدہ عرب امارات اور چین کے ساتھ مختلف مفاہمتی یادداشتوں پر عمل درآمد جاری ہے، جو معاشی تعاون اور سرمایہ کاری کو فروغ دیں گے۔‘فیلڈ مارشل نے پاکستان میں دہشت گردی کے واقعات کے حوالے سے کہا کہ ’افغانستان سے کئی دہش گرد تنظیمیں جس میں فتنہ الخوارج شامل ہے، پاکستان کے خلاف متحرک ہیں۔ اس وقت دہشت گردی کے خلاف پاکستان آخری فصیل ہے۔ دہشت گردوں کے لیے کوئی ہمدردی نہیں اور انہیں پوری قوت سے انصاف کا سامنا کرنا ہو گا۔‘عاصم منیر نے کہا کہ انڈیا اب بھی خطے میں عدم استحکام پیدا کرنے پر بضد ہے۔ (فائل فوٹو: اے ایف پی)سوشل میڈیا کے حوالے سے فیلڈ مارشل عاصم منیر کا کہنا تھا کہ آج کا سوشل میڈیا ایک طاقتور ذریعہ بن چکا ہے، لیکن ملک دشمن عناصر اسے ’مصنوعی افراتفری‘ پیدا کرنے کے لیے بھی استعمال کرتے ہیں۔انہوں نے غزہ کے حوالے سے کہا کہ غزہ میں جاری نسل کشی، ایک بدترین انسانی المیہ ہے جس کے عالمی اور علاقائی دونوں سطح پر شدید مضمرات ہیں۔