محسن نقوی کی اپنے افغان ہم منصب سے ملاقات، ٹی ٹی پی کے حوالے سے بات چیت

پاکستان کے وفاقی وزیر داخلہ محسن نقوی نے کابل میں اپنے افغان ہم منصب سراج الدین حقانی سے اہم ملاقات کی ہے۔ جس میں دوطرفہ تعلقات خصوصا ًانسداد دہشت گردی و دراندازی و کالعدم تحریک طالبان (ٹی ٹی پی) کے حوالے سے تبادلہ خیال کیا گیا۔

اتوار کو وزارت داخلہ کی جانب سے جاری بیان کے مطابق وزیر داخلہ محسن نقوی کا افغان وزارت داخلہ آمد پر افغان وزیر داخلہ سراج الدین حقانی نے خیر مقدم کیا۔

اس موقع پر پاک افغان سرحد کی موثر مینجمنٹ، منشیات کی روک تھام اور سرحد پار نقل و حرکت کو منظم کرنے کے طریقہ کار پر بات چیت کی گئی۔

دونوں رہنماؤں کے مابین پاکستان میں غیرقانونی طور پر مقیم افغان شہریوں کے وطن واپسی کے عمل پر گفتگو کی گئی۔ دونوں وزرائے داخلہ نے پاکستان اور افغانستان کے درمیان پرامن بقائے باہمی، استحکام اور تعاون کی ضرورت پر زور دیا۔ دونوں نے پاک افغان بارڈر مینجمنٹ اور دہشت گردی کے خاتمہ کے لیے باہمی تعاون کو مضبوط بنانے پر اتفاق کیا۔

اس موقع پر وزیر داخلہ محسن نقوی نے بتایا کہ دہشت گرد تنظیمیں فساد اور عدم استحکام کا باعث بن رہی ہیں جسےمل کر روکنا ہو گا، پاکستان افغانستان کے ساتھ برادرانہ اور دیرپا تعلقات کا خواہاں ہے۔

محسن نقوی نے کہا کہ پاکستان نے کئی دہائیوں تک لاکھوں افغان مہاجرین کی بے لوث مہمان نوازی کی، افغان شہریوں کی قانونی طور پر آمد کے دروازے کھلے ہیں۔

اس موقع پر افغانستان کے سینیئر نائب وزیر داخلہ ابراہیم سردار، پاکستان کے نمائندہ خصوصی برائے افغانستان محمد صادق، وفاقی سیکریٹری داخلہ خرم آغا، اعلیٰ سفارتی حکام اور افغان وزارت داخلہ کے عہدیداران بھی موجود تھے۔

قبل ازیں پاکستان کے وفاقی وزیر داخلہ محسن نقوی کے ایک روزہ دورے پر افغانستان کے دارالحکومت کابل پہنچنے پر افغانستان کے نائب وزیر داخلہ محمد نبی عمری نے ان کا استقبال کیا۔

وفاقی وزیر داخلہ محسن نقوی کے کابل پہنچنے پر افغانستان کے نائب وزیر داخلہ محمد نبی عمری نے ان کا استقبال کیا۔ (فوٹو: وزارت داخلہ)خیال رہے کہ اس سے قبل 17 جولائی کو پاکستان کے نائب وزیراعظم اور وزیر خارجہ اسحاق ڈار نے کابل کا دورہ کیا تھا۔

اس موقعے پر پاکستان، افغانستان اور ازبکستان کے درمیان نائب آباد، خرلاچی ریلوے لنک پر مشترکہ فزیبلٹی سٹڈی کے فریم ورک معاہدے پر دستخط ہوئے تھے۔

اسحاق ڈار کا کہنا تھا کہ ’یہ معاہدہ ازبکستان، افغانستان، پاکستان ریلوے کوریڈور کے تحت کیا گیا ہے۔ یہ کوریڈور علاقائی روابط اور اقتصادی انضمام کو فروغ دے گا اور یہ وسطی ایشیائی ممالک کو افغانستان کے ذریعے پاکستانی بندر گاہوں سے جوڑے گا۔‘

اسحاق ڈار کی افغان عبوری وزیراعظم ملا محمد حسن اخوند زادہ سے بھی کابل میں ملاقات ہوئی تھی جس میں دوطرفہ تعلقات کو فروغ دینے کے لیے اعلیٰ سطح روابط برقرار رکھنے پر اتفاق کیا گیا۔

اس کے علاوہ پاکستان کے نائب وزیراعظم نے افغان وزیرخارجہ امیر خان متقی اور افغان وزیرداخلہ سراج الدین حقانی سے بھی ملاقاتوں میں تجارت، ٹرانزٹ، سکیورٹی میں تعاون بڑھانے پر اتفاق کیا۔

اسحاق ڈار کی افغان عبوری وزیراعظم ملا محمد حسن اخوند زادہ سے بھی کابل میں ملاقات ہوئی تھی (فائل فوٹو: دفتر خارجہ)وزارت خارجہ کے بیان کے مطابق ’اسحاق ڈار اور افغان وزیرداخلہ سراج الدین حقانی کی ملاقات میں سیکیورٹی امور پر تفصیلی تبادلہ خیال ہوا اور نائب وزیراعظم  نے سکیورٹی اور بارڈر مینجمنٹ کے مسائل حل کرنے پر زور دیا۔‘