ایپل، ٹیسلا اور مائیکروسافٹ کےشیئرز میں ایک سال کی بد ترین کمی

امریکی صدر ڈونلڈ ٹرمپ کی جانب سے ٹیرف کے اعلان کے بعد ایپل، ٹیسلا اور مائیکروسافٹ کے حصص میں ایک سال کی بد ترین کمی ہوئی ہے۔

امریکی میڈیا کی رپورٹ کے مطابق ایلون مسک کی کمپنی ٹیسلا کےحصص مزید 7 فیصد گر کر 223 ڈالر پر آ گئے ہیں۔

رپورٹ کے مطابق ایپل کے حصص میں 4.5 فیصد جب کہ مائیکروسافٹ کے شیئرز میں 4.9 فیصد کمی ریکارڈ کی گئی ہے۔

کرپٹو کرنسی کے شیئرز میں 5.5 فیصد کمی دیکھی گئی ہے۔ بٹ کوائن کی قیمت 10 فیصد کم ہو کر 78 ہزار ڈالر سے نیچے آ گئی ہے۔

جان بوجھ کر اسٹاک مارکیٹ میں اتار چڑھائو پیدا نہیں کیا ، ٹیرف سے اربوں ڈالر امریکا لا رہے ہیں ، ڈونلڈ ٹرمپ

دوسری طرف امریکی صدر ڈونلڈ ٹرمپ کا مارکیٹ صورتحال پر تبصرہ کرتے ہوئے کہنا ہے کہ جان بوجھ کر اسٹاک مارکیٹ میں اتارچڑھاؤ پیدا نہیں کیا۔

انہوں نے کہا کہ امریکا کی گزشتہ نااہل قیادت کو دنیا نے بری طرح استعمال کیا، ٹیرف دوا کے طور پر کام کر کر رہا ہے ، کسی چیز کودرست کرنے کیلئے دوا لینا پڑتی ہے، ٹیرف سے اربوں ڈالر امریکا لارہے ہیں۔

امریکی ٹیرف ، ایشیائی اور خلیجی اسٹاک مارکیٹوں میں شدید مندی ، اربوں ڈالر کا نقصان

ان کا مزید کہنا تھا کہ اسٹاک مارکیٹ کے مستقبل سے متعلق کچھ نہیں کہہ سکتا، چین کے ساتھ تجارتی خسارہ حل کئے بغیر مذاکرات نہیں ہو سکتے، ٹیرف کے حوالے سے یورپی اور ایشیائی ممالک کے رہنماؤں سے بات چیت ہوئی ہے۔

واضح رہے کہ امریکی ٹیرف کے بعد ایشیائی اور خلیجی ممالک سمیت دنیا کے مختلف اسٹاک مارکیٹس میں شدید گراوٹ دیکھی گئی ہے جس سے اربوں ڈالر کا نقصان ہوا ہے۔