عید کے موقع پر جہاں سیاسی ہلچل اور گرما گرم بحث و مباحثے تھم جاتے ہیں، وہیں نیوز چینلز بھی ہلکے پھلکے اور تفریحی رنگ میں ڈھل جاتے ہیں۔ اس بار آن دی فرنٹ میں کامران شاہد نے ارشاد بھٹی، سہیل عزیزی، ابرار الحق اور خلیل الرحمان قمر کو مدعو کیا اور شو کو مزیدار سوالات سے چار چاند لگا دیے۔

گفتگو کے دوران جب کامران شاہد نے ارشاد بھٹی سے پوچھا کہ انہوں نے اپنی دوسری اہلیہ کو پہلی عید پر کتنی عیدی دی تو بھٹی صاحب نے مسکراتے ہوئے کہا، "میں نے اپنی اہلیہ کو بیس ہزار عیدی دی۔" یہ سنتے ہی تمام مہمان اور ناظرین نے زیادہ حیرانی کا اظہار نہیں کیا، لیکن جیسے ہی انہوں نے وضاحت دی، سب کے چہروں پر حیرت کے رنگ بکھر گئے۔

ارشاد بھٹی نے انکشاف کیا، "یہ بیس ہزار پاکستانی روپے نہیں، بلکہ بیس ہزار ریال تھے!" یعنی پاکستانی کرنسی میں یہ رقم چودہ لاکھ سے زائد بنتی ہے! یہ سن کر پروگرام میں موجود مہمانوں کے چہروں پر دنگ رہ جانے والا تاثر واضح تھا، اور سوشل میڈیا پر بھی یہ خبر جنگل کی آگ کی طرح پھیل گئی۔

دوسری شادی اور ایک نیا آغاز

یہ تو سب جانتے ہیں کہ ارشاد بھٹی کی ذاتی زندگی میں ایک بڑا خلا اس وقت پیدا ہوا جب ان کی پہلی اہلیہ 2022 میں طویل علالت کے بعد انتقال کر گئیں۔ اس صدمے نے انہیں جذباتی طور پر توڑ کر رکھ دیا تھا، جس کا ذکر وہ اکثر ٹی وی پروگرامز میں کرتے رہے۔ تاہم، وقت کے ساتھ زندگی نے انہیں ایک نیا موڑ دیا۔

گزشتہ سال، ارشاد بھٹی نے اپنی کولیگ اور سابقہ اداکارہ سمارا ج سے دوسری شادی کر لی۔ لاہور کی تاریخی بادشاہی مسجد کے قریب ایک معروف ریسٹورنٹ میں ہونے والی اس تقریب میں صرف قریبی عزیز و اقارب اور دوست احباب کو مدعو کیا گیا تھا۔

سوشل میڈیا پر ہلچل

ارشاد بھٹی کی عیدی والی خبر نے سوشل میڈیا پر زبردست دھوم مچادی، جہاں کچھ صارفین حیرانی میں مبتلا نظر آئے، وہیں کئی لوگوں نے مزاحیہ تبصرے بھی کیے۔ ایک صارف نے لکھا، "ایسی عیدی تو نصیب والوں کو ہی ملتی ہے!" جبکہ دوسرے نے طنزیہ انداز میں کہا، "کامران شاہد کو چاہیے تھا کہ ارشاد بھٹی سے یہ بھی پوچھ لیتے کہ کیا یہ عیدی قسطوں میں دی یا ایک ساتھ؟