پاکستانی ڈرامہ انڈسٹری کی مشہور اداکارہ ایمن خان نے اداکاری میں واپسی کے منصوبے شیئر کر دیے۔
ایمن خان اپنی بہترین اداکاری اور دلکش شخصیت کے لیے جانی جاتی ہیں، انہوں نے اپنی شوبز میں واپسی کے ارادوں کا اظہار کر دیا ہے۔
ایمن خان نے کئی سپر ہٹ ڈراموں میں کام کیا، جس میں محبت بھاڑ میں جائے، زندان، من مائل، باندی اور دیگر شامل ہیں۔
ان کی مقبولیت کا اندازہ اس بات سے لگایا جا سکتا ہے کہ انسٹاگرام پر ان کے 12.3 ملین فالوورز ہیں، جو انہیں پاکستان کی مقبول ترین سیلیبریٹیز میں شامل کرتا ہے۔
ایمن خان 2018ء میں اپنے شوہر منیب بٹ سے شادی کے بعد ٹی وی سے دور ہو گئیں، ان کے بقول وہ اپنی فیملی، بچیوں اور کاروبار کو وقت دے رہی تھیں، جس کی وجہ سے انہوں نے اداکاری سے وقفہ لیا۔
ایمن خان نے نجی ٹی وی کی رمضان نشریات میں گفتگو کے دوران اپنی واپسی کے بارے میں کہا کہ میرا جلد واپسی کا ارادہ ہے، لیکن فی الحال میں اپنی فیملی، بچوں اور بزنس میں بہت مصروف ہوں۔
انہوں نے کہا کہ اگر مجھے کوئی ایسا پراجیکٹ ملا، جس میں زیادہ وقت نہ لگے، تو میں ضرور واپسی کروں گی، مجھے ٹی وی پر نہ ہونے کا احساس نہیں ہوتا کیونکہ ہمارے گھر میں ایک اداکار (منیب بٹ) موجود ہیں، اور میرے پرانے ڈرامے بھی لوگ آج تک دیکھ رہے ہیں لیکن میرے فینز اکثر پوچھتے ہیں کہ میں کب واپس آؤں گی، میں جلد ایک بار پھر اسکرین پر نظر آؤں گی۔
ایمن خان کے اس اعلان پر ان کے مداح بہت پرجوش نظر آ رہے ہیں، ان کے پرستار طویل عرصے سے ان کی واپسی کے منتظر تھے اور اب ان کے نئے پراجیکٹس کا بے صبری سے انتظار کر رہے ہیں۔