رمضان میں پیپلز بس سروس سے متعلق اہم اعلان٬ مسافروں کے لیے بڑی سہولت

محکمہ ٹرانسپورٹ سندھ کی جانب سے مسافروں کی سہولت کے لیے رمضان میں پیپلز بس سروس کے اوقات میں توسیع کا اعلان کیا گیا ہے۔

اس حوالے سے سینئر وزیر شرجیل میمن نے کہا کہ 15 رمضان المبارک سے بس سروس رات ایک بجے تک چلائی جائے گی، اطلاق آر 1، آر 2، آر 3، آر 4، آر 9، آر 10 اور ای وی ون روٹ کی بسوں پر ہوگا۔

سینیر وزیر کا یہ بھی کہنا تھا کہ کراچی کے شہریوں کو رمضان میں درپیش مشکلات کا اندازہ ہے، کراچی کے عوام زیادہ تر پبلک ٹرانسپورٹ پر انحصار کرتے ہیں، بسوں کے اوقات میں توسیع کا مقصد شہریوں کو مزید سفری سہولت فراہم کرنا ہے۔

شرجیل انعام میمن کے مطابق اس بات کو یقینی بنایا جائے گا کہ لوگ خریداری کے بعد اپنے گھروں تک محفوظ پہنچ سکیں، حکومت کی جانب سےعوام کو بہتر اور سہولت بخش سفری آپشن فراہم کرناچاہتے ہیں۔

انہوں نے مزید کہا کہ حکومت سندھ عوام کی فلاح و بہبود کے لیے تمام ممکنہ اقدامات کر رہی ہے، شہری پیپلز بس سروس کی توسیع شدہ اوقات کی سروس کا بھرپور فائدہ اٹھائیں۔