کراچی کے شہریوں کے لیے رمضان المبارک کے دوران موسم کے بدلتے رنگ کسی امتحان سے کم نہیں ہوں گے۔ محکمہ موسمیات سندھ کے مطابق، رمضان کا پہلا عشرہ نسبتاً خوشگوار رہے گا، لیکن جیسے جیسے مہینہ آگے بڑھے گا، گرمی کی شدت میں اضافہ ہوگا۔
موسمیاتی ماہرین نے پیش گوئی کی ہے کہ رمضان کے آخری دنوں میں کراچی کا درجہ حرارت 38 ڈگری سینٹی گریڈ تک پہنچ سکتا ہے، جبکہ سندھ کے دیگر جنوبی علاقوں میں پارہ 40 ڈگری کو بھی چھو سکتا ہے۔ ایسے میں روزے داروں کو شدید گرمی کا سامنا کرنا پڑے گا، خاص طور پر آخری عشرے میں جب عبادات بھی اپنے عروج پر ہوں گی۔
محکمہ موسمیات کے فوکل پرسن کے مطابق، صبح کے وقت کراچی میں ہلکی دھند چھانے کا امکان ہے، لیکن جیسے ہی دن چڑھے گا، درجہ حرارت میں نمایاں اضافہ دیکھنے کو ملے گا۔ ماہرین شہریوں کو مشورہ دے رہے ہیں کہ روزے کے دوران خود کو ہائیڈریٹ رکھنے کے لیے افطار اور سحری میں زیادہ سے زیادہ پانی اور ٹھنڈے مشروبات کا استعمال کریں، تاکہ گرمی کے ممکنہ اثرات سے بچا جا سکے۔