’ہمیں فلسطینی ریاست کے حوالے سے سعودی عرب کے بیان کی توثیق کرنی چاہیے‘

نائب وزیراعظم اور وزیر خارجہ اسحاق ڈار نے کہا ہے کہ فلسطینی ریاست کے قیام کے حوالے سے ہمیں سعودی عرب کی طرف سے جاری کردہ بیان کی توثیق کرنی چاہیے۔

منگل کو نیویارک میں نائب وزیراعظم اسحاق ڈار نے او آئی سی گروپ میٹنگ سے خطاب کرتے ہوئے کہا کہ پاکستان او آئی سی کے ایجنڈے پر عمل پیرا ہے۔

ان کا کہنا تھا کہ غزہ میں سیز فائر پر عملدرآمد کے لیے سفارتی راستے اپنانا ہوں گے اور بحالی کے لیے سب کو اپنا کردار ادا کرنا ہوگا۔

نائب وزیراعظم نے مزید کہا کہ مغربی کنارے میں اسرائیلی جارحیت کو روکنے کے لیے اقدامات ضروری ہیں۔

اسحاق ڈار نے کہا کہ فلسطینیوں کو بے دخل کرنے کی تجاویز کی سختی سے مخالفت کرنی چاہیے۔

اس سے قبل اوآئی سی گروپ کی بریفنگ کے دوران سفیروں سے گفتگو میں نائب وزیراعظم اسحاق ڈار نے اسلامی ممالک پرزور دیا کہ وہ فلسطین کے مفادات اور عرب و مسلم امہ کے مقاصد و اصولوں کے تحفظ کے لیے مل کر کام کریں۔

انہوں نے مزید کہا کہ ہمیں مسئلہ فلسطین کے دو ریاستی حل کے تحفظ کے لیے ٹھوس اقدامات کرنا چاہییں۔

اسحاق ڈارنے کشمیریوں کی منصفانہ جدوجہد کے لیے پاکستان کی غیرمتزلزل حمایت کا اعادہ کیا ہے اور عالمی برادری سے کشمیر کے تنازع کو اقوام متحدہ کی سلامتی کونسل کی متعلقہ قراردادوں اور کشمیری عوام کی خواہشات کے مطابق پُرامن طور پر حل کرنے کامطالبہ کیا ہے۔

انہوں نے اقوام متحدہ اور اسلامی تعاون تنظیم کے مشترکہ مقاصد کے حصول کے لیے پاکستان کے پختہ عزم کا بھی اظہار کیا۔