بھارتی رقاصہ و اداکارہ راکھی ساونت کے مطالبے پر مفتی قوی نے جم جوائن کرلیا۔
مفتی قوی نے گزشتہ روز ایک نجی ٹی وی کو انٹرویو دیتے ہوئے بتایا کہ میں نے راکھی ساونت کے مطالبے پر ملتان میں جم جوائن کرلیا ہے۔ اُنہوں نے بتایا کہ کل سے باقاعدہ جم ٹرینر نے جس طرح کے کپڑے اور جوتے بتائے ہیں وہ پہنوں گا۔
مفتی قوی نے بتایا کہ میں نے راکھی ساونت کا جم جوائن کرنے کا مطالبہ اس لیے مانا ہے کیونکہ شریعت میں یہ حکم ہے کہ جسے آپ نکاح کا پیغام بھیجتے ہیں اس کی رائے کا احترام کریں۔
اُنہوں نے کہا کہ اب جب تک راکھی صاحبہ میری فٹنس سے مطمئن نہیں ہوں گی تب تک جم آتا رہوں گا۔ مفتی قوی نے کہا کہ وزن کم کرنے کے لیے میں چاول کھانا اور کولڈ ڈرنکس وغیرہ پینا چھوڑ دوں گا۔
دوسری جانب ایک پاکستانی زمیندار نے راکھی ساونت کو مفتی قوی سے شادی کرنے پر 35 کروڑ روپے کی زمین اور زیورات تحفے میں دینے کا اعلان کیا ہے۔
جنوبی پنجاب سے تعلق رکھنے والے زمیندار سردار مظفر کولاچی کا ویڈیو بیان سوشل میڈیا پر وائرل ہو رہا ہے، جس میں انہوں نے بھارتی رقاصہ کو مفتی قوی سے شادی کرنے پر بطور تحفہ 35 کروڑ روپے کی زمین اور زیورات دینے کا وعدہ کیا ہے۔
وائرل ویڈیو میں زمیندار کہتے ہیں کہ میرا تعلق تونسہ شریف سے ہے۔ ہم راکھی ساونت صاحبہ کی بہت عزت کرتے ہیں۔ میرے پاس ہیرے اور سونے کے زیورات ہیں، جو نایاب اور قیمتی ہیں۔ اگر راکھی ساونت مفتی قوی سے شادی کرتی ہیں تو میں یہ ان کو تحفے میں دوں گا۔
انہوں نے بتایا کہ سفید سونے سے بنی 7 تولے کی چین ہے، ایک ہیرے کی انگوٹھی اور کف لنکس ہیں، یہ بھی سفید سونے سے بنے ہوئے ہیں، یہ مردانہ ہیں لیکن اگر راکھی کہیں گی تو زنانہ بھی بنوا دوں گا۔ بہترین برانڈز کے پرفیومز اور گھڑیاں ہیں، جو میں راکھی ساونت کو دینا چاہوں گا، اگر وہ مفتی قوی سے شادی کرنے کے لیے راضی ہو جائیں تو، ہم مفتی قوی کے ساتھ دبئی جانے کے لیے بھی تیار ہیں۔
وائرل ویڈیو میں مفتی قوی نے بتایا کہ ان تمام قیمتی اشیاء کے ساتھ سردار مظفر کولاچی اپنی زمینوں میں سے بھی کچھ حصہ بطور تحفہ دینے کے لیے تیار ہیں۔ ان تمام اشیاء اور زمین کی مالیت تقریباً 35 کروڑ روپے بنتی ہے، یہ مجھے اس وقت ملیں گی جب راکھی ساونت مجھ سے شادی کریں گی، جس پر میں سردار مظفر کا شکر گزار ہوں، راکھی سے شادی کے بعد میں یہ تمام اشیاء اور زمینیں ان کو دے دوں گا۔