انڈیا کی وزارت خارجہ نے کہا ہے کہ وزیراعظم نریندری مودی اگلے ہفتے امریکہ کے دورے میں صدر ڈونلڈ ٹرمپ سے ملاقات کریں گے۔خبر رساں ایجنسی اے ایف پی کے مطابق انڈین سیکریٹری خارجہ وکرم مسری نے صحافیوں کو بتایا کہ وزیراعظم نریندر مودی اُن گنے چنے عالمی رہنماؤں میں شامل ہوں گے جو صدر ٹرمپ کے عہدہ سنبھالنے کے بعد امریکہ کا دورہ کریں گے۔نریندر مودی اگلے ہفتے دو روزہ دورے پر 12 فروری کو واشنگٹن پہنچیں گے۔انڈٰیا کے سیکریٹری خارجہ نے بتایا کہ ’اس دورے سے نئی امریکی انتظامیہ کے ساتھ دوطرفہ دلچسپی کے تمام شعبوں میں تعاون کے لیے تبادلہ خیال کا موقع ملے گا۔‘ان کا کہنا تھا کہ وزیراعظم نریندر مودی کی صدر ٹرمپ سے دوطرفہ تعلقات پر ملاقات بھی ہوگی۔وکرم مسری نے کہا کہ ’حالیہ برسوں میں یہ ہماری مضبوط ترین بین الاقوامی پارٹنرشپس میں سے ایک ہے۔ اور وزیراعظم کا دورہ نئی امریکی انتظامیہ سے فوری رابطوں کے اسی سلسلے کی کڑی ہے۔‘انڈیا کے وزیراعظم نریندر مودی اُن عالمی رہنماؤں میں شامل تھے جنہوں نے ڈونلڈ ٹرمپ کے حالیہ انتخابی کامیابی پر اُن کو فوری مبارکباد کا پیغام بھیجتے ہوئے ’ڈیئر فرینڈ‘ لکھا تھا۔ انہوں نے گزشتہ ماہ کہا تھا کہ وہ نئی دہلی کے واشنگٹن سے قریبی رابطوں اور ساتھ کام کے خواہشمند ہیں۔جنوری میں سوشل میڈیا پلیٹ فارم ایکس پر نریندر مودی نے لکھا تھا کہ ’میں ایک بار پھر مل کر کام کرنے کی راہ دیکھ رہا ہوں جو دونوں ملکوں کے لیے فائدہ مند ہو، اور جو دنیا کے بہتر مستقبل کی تشکیل کا راستہ ہموار کرے۔‘تاہم گزشتہ ماہ کے اختتام پر وائٹ ہاؤس کے مطابق نریندر مودی سے فون کال پر گفتگو میں صدر ٹرمپ نے اُن پر ’شفاف‘ تجارتی تعلقات پر زور دیا تھا۔امریکہ کے صدر ٹرمپ کو دنیا بھر میں اس وقت تجارتی تعلقات کے حوالے سے اپنے سخت مؤقف کو پیش کرنے پر تنقید کا بھی سامنا ہے۔صدر ٹرمپ اور نریندر مودی نے فون پر گفتگو میں ’کواڈ‘ گروپ کو مزید مضبوط بنانے پر بھی بات کی تھی جس میں آسٹریلیا اور جاپان بھی شامل ہیں، اور اس گروپ کو چین کے خلاف تجارتی سطح پر محاذ کے طور پر دیکھا جاتا ہے۔
انڈیا رواں سال کے دوران اس گروپ کے رہنماؤں کے اجلاس کی میزبانی بھی کرے گا۔
انڈیا اور امریکہ کے رہنماؤں کو اُن کے ناقدین آمرانہ رجحانات والے رہنما قرار دیتے ہیں۔ اور ان دونوں رہنماؤں نے گزشتہ دور اقتدار میں سنہ 2017 تا سنہ 2021 قریبی مراسم استوار کیے تھے۔
انڈیا کے وزیراعظم نریندر مودی نے سنہ 2017 اور سنہ 2019 میں امریکہ کے دورے کیے تھے۔