شادی میں دلہن کا تصور آتے ہی ذہن میں میک اپ سے آرائش گیسو تک سجی سنوری تصویر آتی ہے لیکن لوگ گنجی دلہن دیکھ کر حیران رہ گئے۔
سوشل میڈیا پر تیزی سے ایک ویڈیو وائرل ہو رہی ہے جس میں ایک ایسی دلہن کو دیکھا جا سکتا ہے جو گنجی ہے اور اپنی شادی سے بھرپور انجوائے کر رہی ہے۔
رپورٹ کے مطابق یہ منفرد شادی بھارتی نژاد برطانوی شہری نیہر سچدیوا کی ہے۔ جس کے شیر خواری کی عمر میں لگنے والی ایک بیماری کے باعث سر پر بال نہیں ہیں۔
بہت ساری خواتین جو کسی بیماری کی وجہ سے اپنے گنج پن کو وگ لگا کر چھپاتی ہیں۔ تاہم نیہر سچدیوا نے کمال بہادری کا مظاہرہ کرتے ہوئے اپنی ہی شادی میں گنجا سر سب کو دکھا کر مثال بھی قائم کی۔
ویڈیو میں دیکھا جا سکتا ہے کہ نیہر سچدیوا سرخ رنگ کے عروسی لباس پہنے اسٹیج پر دلہا کے پاس جا رہی ہیں۔ اسی دوران وہ اپنا دوپٹہ ہٹاتی ہیں اور فخریہ انداز میں اپنا گنجا سر سب کو دکھاتی ہیں۔
شادی کی تقریب میں یہ منظر دیکھ کر مہمان پہلے تو حیرت زدہ رہ گئے اور جب حقیقت کا علم ہوا تو دلہن کی بہادری کو سراہا۔
اس وائرل ویڈیو کو اب تک ہزاروں افراد دیکھ چکے ہیں اور لڑکی کے عمل کی تعریف کر رہے ہیں۔ ان کا کہنا ہے کہ نیہر کے اس عمل سے وہ خواتین جو کسی وجہ سے اپنے بال گنوا دیتی ہیں، ان کا احساس محرومی ختم ہوگا۔
رپورٹ کے مطابق نیہر کو 6 ماہ کی عمر میں ہی ایلوپیشیا کی تشخیص ہوئی تھی۔ یہ ایک ایسی حالت ہے جو جسم یا سر پر بالوں کے جھڑنے کا سبب بنتی ہے۔