پاکستان ٹیلی ویژن انڈسٹری کی ابھرتی ہوئی اداکارہ حریم سہیل جلد ہی شادی کے بندھن میں بندھنے والی ہیں اور آج کل سوشل میڈیا صارفین ان کی مایوں کی تصاویر کے سحر میں مبتلا ہیں۔
حریم سہیل کا شمار شوبز انڈسٹری کے نوجوان فن کاروں میں ہوتا ہے، بہت کم لوگ جانتے ہیں کہ وہ سینئر اداکارہ بینا چوہدری کی صاحبزادی ہیں، وہ گھسی پٹی محبت، بد دعا اور اقتدار جیسے ڈراموں میں اداکاری کے جوہر دکھا چکی ہیں۔
اداکارہ ان دنوں اپنی شادی کی تیاریوں میں مصروف اور شادی کے فنکشنز سے لطف اندوز ہو رہی ہیں۔
ان کی جانب سے انسٹاگرام پر مایوں کی ویڈیوز اور تصاویر پوسٹ کیے جانے سے ان کے مداح حیران رہ گئے ہیں۔
انہوں نے دیگر اداکاروں کی طرح شادی کا باقاعدہ اعلان نہیں کیا، تاہم گھر پر منعقد کی جانے والی مایوں کی تقریب کی تصاویر اور ویڈیوز پوسٹ کرکے اپنی زندگی کے نئے باب کے آغاز سے متعلق سب کو آگاہ کیا۔
گزشتہ روز ان کی مایوں کی مختصر تقریب کا اہتمام کیا گیا، جس میں ان کے قریبی رشتے داروں کے علاوہ عزیز و اقارب نے شرکت کی۔
سوشل میڈیا پر وائرل ہونے والی تصاویر اور ویڈیوز میں دیکھا جاسکتا ہے کہ مایوں کی تقریب میں بےجا نمودو نمائش نہیں بلکہ سادگی اور روایات کا عنصر غالب رہا، سجاوٹ سے لے کر ملبوسات تک ہر چیز میں روایتی پیلا رنگ نمایاں نظر آیا۔
ویڈیو میں اداکارہ اپنی سہیلیوں اور کزنز کے ساتھ خوشگوار موڈ میں نظر آتے ہوئے ان سے پوچھتی ہیں کہ ’کیسی لگ رہی ہوں؟‘
انہیں اپنی سکھیوں کے ساتھ تصویر بنواتے اور ڈانس کرتے بھی دیکھا جا سکتا ہے۔
مایوں کے اعلان کے بعد اداکارہ کے لیے ان کے مداحوں اور ساتھی فن کاروں کی جانب سے نیک تمناؤں کا سلسلہ شروع ہو گیا ہے۔