خیبر پختونخوا: سکیورٹی فورسز کا آپریشن، 22 عسکریت پسند ہلاک، چھ اہلکار جان سے گئے

صوبہ خیبر پختونخوا میں تین الگ الگ آپریشنز میں سکیورٹی فورسز نے 22 عسکریت پسندوں کو ہلاک کیا، جبکہ چھ اہلکار جان سے گئے۔

سنیچر کو فوج کے شعبہ تعلقات عامہ (آئی ایس پی آر) کی جانب سے جاری پریس ریلیز کے مطابق سیکورٹی فورسز نے ’خوارج‘ کی موجودگی کی اطلاع پر ضلع ٹانک کے علاقے گل امام میں انٹیلی جنس کی بنیاد پر آپریشن کیا جس کے نتیجے میں نو عسکریت پسند ہلاک جبکہ چھ زخمی ہوئے۔

سکیورٹی فورسز کی جانب سے ضلع شمالی وزیرستان میں کیے گئے ایک اور آپریشن میں 10 پسندوں کو ہلاک کیا۔

تیسرے آپریشن میں سکیورٹی فورسز نے ضلع تھل میں چوکی پر حملے کی کی کوشش کو ناکام بنا دیا اور تین عسکریت پسندوںکو ہلاک کر دیا، تاہم شدید فائرنگ کے تبادلے کے دوران سکیورٹی فورسز کے چھ اہلکار جان سے گئے۔

مزید کہا گیا کہ ’علاقے سے عسکریت پسندوں کے خاتمے کے لیے آپریشن جاری ہے۔ پاکستان کی سکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔‘