چاکلیٹ ذیابیطس کا خطرہ کیسے کم کرتی ہے؟ تحقیق جس سے آپ بھی فائدہ اٹھا سکتے ہیں

ایک منفرد اور طویل المدتی تحقیق نے انکشاف کیا ہے کہ دیگر میٹھی اشیاء کے برخلاف ڈارک چاکلیٹ نہ صرف ذیابیطس کا خطرہ کم کرتی ہے بلکہ صحت کے لیے بھی فائدہ مند ہو سکتی ہے۔ اگر ہفتہ وار 30 گرام ڈارک چاکلیٹ استعمال کی جائے، تو ذیابیطس میں مبتلا ہونے کے امکانات 21 فیصد تک کم ہوسکتے ہیں۔

عمومی طور پر میٹھی اشیاء، خاص طور پر چاکلیٹ، کو ذیابیطس کے لیے خطرہ سمجھا جاتا ہے، مگر اس تحقیق نے ان تمام تصورات کو چیلنج کر دیا ہے۔ طبی جریدے ’بی ایم جے‘ میں شائع ہونے والی اس تحقیق میں تقریباً 1 لاکھ 92 ہزار رضاکاروں کی تین دہائیوں تک تفصیلی جانچ کی گئی۔

تحقیق کے آغاز میں تمام رضاکار ذیابیطس سے پاک تھے، اور ہر دو سال بعد ان کی خوراک، طرز زندگی، اور طبی معائنے کیے گئے۔ نتائج میں معلوم ہوا کہ جن افراد نے ڈارک چاکلیٹ کا استعمال کیا، ان میں ذیابیطس کا خدشہ نمایاں طور پر کم تھا، جب کہ دوسری اقسام کی چاکلیٹس یا بالکل چاکلیٹ نہ کھانے والے افراد میں یہ خطرہ زیادہ پایا گیا۔

ماہرین کا کہنا ہے کہ اگرچہ یہ تحقیق ابتدائی نتائج فراہم کرتی ہے، لیکن ڈارک چاکلیٹ کے صحت پر مثبت اثرات کو مزید گہرائی سے جانچنے کی ضرورت ہے۔