سعودی عرب کے شمالی علاقے الجوف میں اس ہفتے کی ابتداء میں ایک نیا قدرتی منظر دیکھنے کو ملا، جب خطے میں تاریخ میں پہلی بار برف باری ہوئی۔ سعودی عرب جیسے خشک اور صحرائی خطے میں برف کا ہونا ایک غیر معمولی اور شاذ واقعہ ہے۔
سعودی میڈیا کے مطابق، الجوف میں بارشوں اور ژالہ باری نے نہ صرف برف باری کا سبب بنایا بلکہ اس کے ساتھ ساتھ اس علاقے کی خشک وادیوں میں نئی زندگی کی لہر دوڑا دی۔
اس علاقے میں جہاں بہار کے موسم میں بمشکل جنگلی پھول کھلتے تھے، وہاں اب خوشبودار پودوں اور موسمی پھولوں کی افزائش کا امکان ظاہر کیا جا رہا ہے، جو خطے کی قدرتی خوبصورتی میں نیا رنگ بھریں گے۔
سعودی محکمۂ موسمیات نے اس غیر معمولی موسمی تبدیلی کو مدنظر رکھتے ہوئے، الجوف اور اس کے گرد و نواح میں طوفانی بارشوں اور ژالہ باری کی وارننگ جاری کر دی ہے۔ محکمۂ موسمیات کے مطابق، آنے والے دنوں میں گرج چمک کے ساتھ مزید بارش اور ژالہ باری متوقع ہے، جس کے ساتھ تیز ہوائیں بھی چل سکتی ہیں جو سفر کو متاثر کر سکتی ہیں۔
مقامی حکام نے رہائشیوں کو اس موسم کی شدت سے بچنے کے لیے احتیاطی تدابیر اختیار کرنے کی ہدایات جاری کی ہیں۔
یہ واقعہ سعودی عرب میں موسمیاتی تبدیلی کے اثرات کا حصہ ہے، جس کا سامنا دیگر عرب ممالک جیسے متحدہ عرب امارات بھی کر رہے ہیں۔ وہاں بھی بارش اور ژالہ باری کے ساتھ گرج چمک کا سامنا ہے، جس نے پورے خطے میں موسم کی شدت کو مزید بڑھا دیا ہے۔