آسٹریلیا کی ہنٹر ویلی کی پہاڑیوں میں ایک عام ہائیکنگ کا دن اس وقت سنسنی خیز کہانی میں بدل گیا جب میٹلڈا نامی ایک خاتون نے اپنے موبائل فون کو اٹھانے کی کوشش میں زندگی کا سب سے بڑا چیلنج جھیل لیا۔
یہ واقعہ تب پیش آیا جب ہائیکنگ کرتے ہوئے میٹلڈا کا فون نیچے موجود ایک تنگ شگاف میں جاگرا۔ وہ اسے نکالنے کے لیے نیچے جھکی تو اچانک پھسل گئیں اور تین میٹر گہری دراڑ میں جاگریں، جہاں وہ تقریباً 4 انچ چوڑے خلا میں الٹی حالت میں پھنس گئیں۔
میٹلڈا کی مشکلات یہاں ختم نہیں ہوئیں۔ وہ سات گھنٹے تک اس خطرناک حالت میں جکڑی رہیں، ان کے دوستوں نے نکالنے کی ہر ممکن کوشش کی، مگر ناکام رہے۔ ایک گھنٹے بعد ریسکیو ٹیم نے وہاں پہنچ کر کوششیں شروع کیں، جہاں انہوں نے چٹانوں کے بڑے بڑے پتھر کاٹ کر ان تک رسائی حاصل کی۔
یہ ریسکیو آپریشن اتنا آسان نہیں تھا، ٹیم کو چھ پتھروں کو ہٹانا پڑا، جن میں سے ایک کا وزن تقریباً 500 کلوگرام تھا۔ ان چٹانوں کی موجودگی سے میٹلڈا تک پہنچنا تقریباً ناممکن ہوچکا تھا۔
حیران کن طور پر جب میٹلڈا کو باہر نکالا گیا تو وہ معمولی زخموں اور چند خراشوں کے علاوہ محفوظ تھیں، تاہم الٹا لٹکے رہنے کی وجہ سے ان کا خون سر میں جمع ہوگیا تھا، جس کی وجہ سے وہ تھکن اور چکر آنے کی کیفیت میں مبتلا تھیں۔
ریسکیو ٹیم کے اس شاندار آپریشن کے بعد اگرچہ میٹلڈا کی جان بچ گئی، لیکن ان کا فون ابھی تک کہیں گہری چٹانوں کے درمیان چھپا ہوا ہے۔