کچھ دنوں پہلے سلمان خان کے قریبی لوگوں میں سے ایک بابا صدیقی کے قتل کے بعد بالی ووڈ کے بھائی جان اور گینگسٹر لارنس بشنوئی کے درمیان دشمنی کی نئی بحث چھڑ گئی ہے۔
ممبئی پولیس کو ایک دھمکی آمیز پیغام بھی ملا ہے ، جس میں 5 کروڑ روپے کا مطالبہ کیا گیا تھا اورساتھ ہی یہ دھمکی بھی دی گئی ہے کہ سلمان خان کی حالت بابا صدیقی سے بھی بددتر ہوگی۔ ایسے میں سلمان خان کے والد سلیم خان کا تازہ بیان سامنے آیا ہے، جس میں انہوں نے واضح طور پر کہہ دیا ہے کہ ان کے بیٹے سلمان خان کبھی بھی معافی نہیں مانگیں گے۔
بھارتی میڈیا کے مطابق سلیم خان نے ایک انٹرویو میں صاف الفاظ میں کہہ دیا ہے کہ ان کا بیٹا سلمان خان کسی بھی صورت میں معافی نہیں مانگیں گے۔ انہوں نے مزید کہا کہ سلمان خآن نے کبھی کسی جانور کو نہیں مارا۔ جانور تو دور کی بات ہے سلمان نے تو آج تک ایک کاکروچ بھی نہیں مارا ہے۔ ہم تشدد پر یقین رکھنے والے لوگوں میں سے نہیں ہیں۔
بھارتی رپورٹس کے مطابق انہوں نے کہا کہ سلمان خان نے کبھی جانوروں کا شکار نہیں کیا اور سلمان خان کو ملنے والی دھمکیاں محض بھتہ خوری ہے۔
سلیم خان نے مزید کہا کہ لوگوں کا ہم سے کہنا ہے کہ آپ ہمیشہ زمین کی طرف دیکھ کر چلتے ہیں۔ آپ میں بہت عاجزی ہے، یہ کوئی شرم کی بات نہیں ہے۔ مجے ڈر ہوتا ہے کہ کہیں کوئی ننھا سا کیڑا بھی میرے پاوں کے نیچے آکر زخمی نہ ہو جائے۔ اس لیے میں انہیں بچانے کے لیے محتاط ہو کر چلتا ہوں۔ سلمان خان نے ہمیشہ دوسروں کی مدد کی ہے۔
یاد رہے کہ لارنس بشنوئی گینگ کی جانب سے سلمان خان کو دھمکیاں دینے کا سلسلہ جاری ہے۔ بشنوئی گینگ نے سلمان خان کے گھر پر حملہ بھی کیا تھا ، جس کے ایک مجرم کو ہریانہ سے گرفتار کر لیا گیا ہے۔ سلمان خان کی سیکیورٹی کو بھی مزید بڑھا دیا گیا ہے اور وہ ہرطرف پولیس کے گھیرے میں نظر آتے ہیں۔