اسرائیلی مظالم کا سلسلہ جاری ، غزہ پر بمباری کے نتیجے میں مزید 10 فلسطینی شہید اور متعدد زخمی ہو گئے جبکہ خان یونس میں دوبارہ آپریشن سے دو لاکھ کے قریب فلسطینی بے گھر ہوئے ہیں۔
عرب میڈیا کی رپورٹ کے مطابق اسرائیلی طیاروں نے خان یونس سمیت متعدد علاقوں میں گھروں پر بم برسا دیئے جس کے نتیجے میں شہادتیں ہوئیں۔
ٹرمپ نے اسرائیلی وزیراعظم سے ملاقات سے قبل غزہ میں جنگ بندی کا مطالبہ کردیا
دوسری جانب اقوام متحدہ کی رپورٹ کے مطابق خان یونس شہر میں اسرائیلی آپریشن دوبارہ شروع ہونے کے بعد گزشتہ 4 دن میں ایک لاکھ 80 ہزار سے زائد فلسطینی بے گھر ہوئے ہیں۔
واضح رہے کہ غزہ جنگ میں فلسطینی شہداء کی مجموعی تعداد 39 ہزار سے تجاوز کر گئی ہے، شہید اور زخمیوں میں نصف سے زائد تعداد صرف بچوں اور خواتین پر مشتمل ہے۔