لاہور ہائی کورٹ نے سابق وزیراعظم عمران خان کے خلاف نو مئی کو ہونے والے ہنگاموں کے تناظر میں درج 12 مقدمات میں جسمانی ریمانڈ کالعدم قرار دے دیا ہے۔
لاہور ہائی کورٹ کے دو رکنی بینچ نے جمعرات کو تحریک انصاف کے بانی عمران خان کے 12 مقدمات میں جسمانی ریمانڈ کے خلاف درخواستوں پر سماعت کی۔
عدالت نے سابق وزیراعظم عمران خان کے 12 مقدمات میں جسمانی ریمانڈ کے خلاف درخواستوں پر محفوظ فیصلہ سنایا۔
عدالت نے عمران خان کی ویڈیو لنک کے ذریعے حاضری کے نوٹی فکیشن کو بھی کالعدم قرار دے دیا ہے۔
عمران خان کی 12 مقدمات میں جسمانی ریمانڈ دینے کے انسداد دہشت گردی عدالت کے فیصلے کے خلاف درخواستیں لاہور ہائی کورٹ میں سماعت کے لیے مقرر کی گئی تھیں۔
درخواستوں میں مؤقف اختیار کیا گیا تھا کہ ’لاہور اے ٹی سی نے جسمانی ریمانڈ دیتے وقت ریکارڈ کا درست جائزہ نہیں لیا، جیل میں قید ہوں اور پولیس پہلے بھی تفتیش کر چکی ہے۔‘
درخواستوں میں مزید کہا گیا تھا کہ جسمانی ریمانڈ دیتے وقت قانون کو بھی مدنظر نہیں رکھا گیا، لہٰذا لاہور ہائی کورٹ سے استدعا ہے کہ وہ اے ٹی سی کی جانب سے 12 مقدمات میں دیا گیا جسمانی ریمانڈ کالعدم قرار دے۔‘
یاد رہے کہ 15 جولائی کو لاہور کی انسداد دہشت گردی کی عدالت نے 12 مقدمات میں عمران خان کا 10 روزہ جسمانی ریمانڈ منظور کیا تھا۔